سفر زند و شاعری
نوشت: نزار قبانی | مَٹ: عتیق آسکوہ بلوچ
بیستمیکو بشخ
ای و ڈون ژوانی
ڈون ژوانی سفت کنے آ اسُل بننگ کپک، دا سوب کہ نن چانہ کہ ڈون ژوان بے چکاری نا تیوہ غا ہد و کچ آتیان آجو بندغ اس ئس، او ‘ہوس پرستی’ نا طب اس تخاکہ، مابت اونا رہی آ زالبول تا بدن آ مرغنا پند ئنا پِن ئس۔ ڈون ژوان روزگاری پالوان اس مریک ہرانا رہی آ مابت نا گمان ہچ ءُ اہمیت اس تخپک، و گواچن اٹ او مابت نا معاملہ غاتیٹ مفک ہم۔ او اسہ مسافر ئسے ہرانا کرک آک ءُ نہ مِزل آک۔
ہراڑاسکان کنا تعلقداری ءِ، اسہ پین ڈول نا مسافر ئسے اُٹ۔ اندنو مسافر اس ہرا تیوہ غا کرک آتیان نمن مفک۔ ولے اونا مِلی اٹ کرک ئنا اسہ ٹہیفوک دروشم اس مریک، دُن تو او تپک کہ او ہرادکن ءِ و ہرا وخت ہمو کرک اسکان سر مرو۔ ڈون ژوانی نہ کنا طب ئٹی ءِ و نہ کنا سرشت ئٹ، و دن ہم چوکری تا سوداگری کنا پیشہ اف۔
ای زالبول تے بہا اٹ ہلنگ آ باوری تخپرہ؛ ای دنو زالبول اسیتون مابت کننگ کپرہ ہرا کنے گمان کریفے کہ او تینا بدن ءِ کنے آ بہا کننگ ءِ۔ تینا نوک بروتی ئٹ ہم بدن بہا کننگ نا بازار کنکن جان خلاسی نا کسر مننگ کتئو، حالانکہ کنا ہم سن سنگت آتا معاملہ کنے آن چھپ مسکہ؛ کنے اندن لگاکہ دنکہ ای تینا بج آ جہان نا کتاب آتا بڈ ءِ تخانٹ۔ ہرا وخت ای بدن بہا کروک زالبول نا کوٹی آن پیشن مسوٹہ گڑا تینا بدن آن بشخنگ نا خواستگار مسوٹہ، ای اسہ گناہگار چُنا ئسے آنبار اونا مونا ہوغاٹہ، کہ بلکن او کنے بشخے۔
گڑا بدن تون خڑکی کنا رہی آ دنو دیوال اس اف ہراڑے سر مریسہ جہان ایسر مرے، نہ او تُغ تروک گولی ئسے ہرادے کیدسہ ای خاچیو۔ ای بدن ءِ صاحبِ بدن آن جتا کننگ کپرہ، نئے تو جہان نا ہر بندغ کن مننگ کروک ءِ کہ ای مردہ خانہ ئٹ تموک اسہ ہم جوْن اسیتون خاچے۔ ای دنو اخہ نرینہ ءِ چاوہ ہرافتا نیمہ سن مڑدہ خانہ غاتیٹ گدرینگا؛ او قصاب نا ڈول مابت کیرہ، قصاب نا ڈول بدنی وڑئٹ چَس ہلیرہ۔ اوفتے میل و خراس اٹ فرخ گمان مفک و نہ زالبول و جوْن ئٹ۔ کنا خڑک دا بندغ آتا تعلقداری بندغی آن اف بلکن آدم خور کُڑدہ آن ءِ۔
بدن نا تینا پارہ غا چِکنگ، چاہے دانا بابت اخس گپ تران کننگے، گواچن اٹ اِرا بدن نا نیامٹ ساری ڈھکوک ہیت ءُ۔ دا چس ہلنگ و سرور نا دشت ئٹ سیر سوات ءِ۔ دا خازہ انگا ریک نا بیرم آ نوجوان تا نیامٹ مروک مونتس ءِ، ہراٹی نہ کٹوک مریک و نہ کٹیفوک۔ مابت و بدن نا بابت ئٹ کنا اندا بنماسی تران ءِ۔
ہرا مخلوق کنے خڑک آن چائک اوفتے سما ءِ کہ ای، تینا رومانوی تعلقداری تیٹ، اصول راستگی تون تفوک مسونٹ، تینتون ہم و ہمو زالبول تیتون ہم ہرافتون کنا چاہنداری مسونے؛ داڑاسکان تینا بے بِسون تعلقداری تیٹ ہم ای ہچبر ریفنگ و چرپ زبانی آن کاریم ہلتوٹ، ہسپانیہ ئٹ ہم اسہ زالبول ئسے نا خڑکی ءِ دوئی کننگ کن ای خیالی ماڑی ٹہیفتوٹ۔ کنا لوز آک ساندہ کنا جوزہ غاتا راست آ نمائندہ مسونو؛ ای ہچبر زالبول اسیتون ہمو وخت اسکان دا پاتویٹ کہ نی کنا مابت اُس ہراتم اسکان کنا لوز آتیان گواچن اٹ اندا معنہ مف۔
ای بھازا زالبول تے آن بیرہ اندا سوب آن جتائی خناٹ کہ کنے ٹی اداکارانہ لائخی تا کمبوتی ئس، و دا سوب آن ہم کہ سفت کروک آتا ڈول پُچ بیننگ، تینا جوزہ غاتیا ہزار رنگ ئنا رنگ خوشکنگ و دنو کڑدار اس ایسری تننگ آن چرجوئی تون نمن کروک مسوٹ ہراڑتون کنا امنائی اَلو۔ ای وختس اسہ نادرست زالبول اسیتون ٹیلیفون آ ہیت کتوٹہ، نہ اسہ دنو ہورک ملی نیاڑی اسیتون تینا مون ءُ ہیت کننگ کیوہ ہراڑتون پاننگ ہچس مف۔ اُلسی مجلس آتیٹ اسہ زالبول ئسے آ تینے بٹپرہ، داڑاسکان کنے گمان مرے کہ او کنا ہیت آتیتون اُست خواہی تخنگ ءِ۔ اسہ دروشم اسیٹ ہم بے مسخت نا، خاص ڈول اٹ جوزہ ئی بے مسختی نا، گواچی مننگ کپرہ۔
کنا خیال جوزہ غاتا درشان نا مارنگ تینٹ جوزہ غاتیان زیات اہمیت تخک۔ گڑا مابت، چاہے اخہ در عظیم مرو، ہمو وخت بد آ دروشم ءِ تینائی کیک ہراتم اودے بد دروشمی تون مونا ہتنگے۔ مابت آن کنا خننگ نزور مریک نہ تُرڈو ہلیوہ۔ ای ساندہ خن تے ملیسہ مابت کیوہ و و تینا مابت ءِ اونا گواچن آ دروشم ئٹ اوننگ آ پورو قدرت تخیوہ۔ ای کْور آ مابت ءِ منیپرہ۔
مابت اسہ پارہ نا یا اِرا پارہ نا آمخی تون ٹہیفوک مننگ کپک۔ اندا سوب آن دئے ہزار زالبول نا نیامٹ ہم ای ہمو زالبول تون مابت کروٹ ہرادے ایلو زالبول تیان گچین کننگ کن کنا ہوش و سار و مِلی جاراتی نا موْکل ایتر۔
کنا مابت کروک آتیان اسٹ اس کنے پارے: نی کنتون مابت کپیسہ انتیکہ نی ٹَک بھاز خلیسہ۔ ای اودے ورندی تسوٹ: نئے، بلکن ای نیتون مابت کیوہ انتیکہ ای ٹَک زیات خلیوہ۔
مابت نا پارہ غا کنا دا درشان کنا شاعری نا اسہ بشخ اسیٹ بھازا بدلی تا دروشم اٹ مونا بسونے۔ دانا سوب زالبول تا بھاز قسم آک ءُ ہرافتا کنو ہل و تس مس، و ہموفک دا بدلی نا پد ئنا سوب آک مسر۔ داٹی ہچو شک اس اف کہ ہر زالبول تینا جتا گچین گواچن اس تخوک مریک، و اندا گواچن نے ہمو زالبول نا بابت اسہ ہیت اس تینائی کننگ آ بَچ ایتک۔ دُن کیہی ہیت آک ودی مریرہ و شرہ نا اسہ لڑ اس روان مریک۔ شرہ آن نرینگ مننگ کپک، بلکن داتو فنکار نا عمل نا الّمی بشخ ءِ۔ ای ہمو وخت ترند آن مخیوہ ہراتم اسہ بندغ اس کنے آن دا سوج ءِ کیک “مابت نا بابت 1940 ئٹ نی دا ہیت ءِ پاریسس، دوارہ دا ہیت، و دوارہ 1972 ئٹ نی فلاں ہیت ءِ کریس ہرا نا اولیکو ہیت نا برخلاف ہننگ ءِ۔”
کنا عاشقانہ شاعری نا وخت سی سال آ تالان ءِ۔ دا نیامٹ کنا شعری جاز ہزار آ کرک آتیا لنگر بٹے، ہزار آ زالبول تیتون ای ڈک لگاٹ۔ ہرا گام تون کنا ذوق، کنا دلیل و کنا ہور تا رنگ و اوفتا کچ اٹ بدلی بریسہ کرے۔ مابت نا ہرا دلیل دمشق اٹ ئس او داڑان جتا ئس ہرا ہانگ کانگ ئٹ ئس، دوارہ سوہو ئٹ پین مس، دوارہ ڈوسلڈورف، غرناطہ، شنگھائی، شارع الحمراء، و گارڈن سٹی ئٹ ہم بدل مریسہ کرے۔ دا شار تیتون تعلقدار ہر زالبول تینا ذات ئٹ اسہ براعظم اس ئس: اونا تینا ساف ءُ آسمان اس ئس، تینا پِر و تینا ہی مُد ئنا بدلیک۔ ہر زالبول اسہ پوسکنو بولی و پوسکنو اسلوب اسیتون نوشتہ مروک کتاب اس ئس۔ کنکن الّمی ئس ہر براعظم ءِ پٹ و پول کیو و ہرا کتاب ءِ خوانیو۔
ای ہر زالبول آن کتابِ عشق نا اسہ سبخ اس ہیل کریٹ۔ دمشقی زالبول آن لج و گچین طب، عراقی زالبول آن درشانی و کبریائی، فرانسیسی زالبول آن آزموندہ ئی، چینی زالبول آن دانائی، انگریزی زالبول آن کڑمبی، ہسپتانوی زالبول آن زور اوننگ، و لبنانی زالبول آن جاز و کرک آتا بابت فونیقی چاہنداری (یعنی جارات و سوگوْی) ہیل کریٹ۔
کنے منا شئر کنے مخلوق نا مونا الف لیلہ والا شہریار نا ڈول لائخی تیتون مونا ہتیرہ۔ دا خوْنی بادشاہ تینا بیرم ءِ زیبا تا تڑنگ نا تڑہ و تینا تُغ ہند ءِ قبرستان ئٹ جوڑ کریسس۔ ہراتم ای تینا نظم “الرسم بالکلمات” (لوز آتیان عکس کشی) ئٹ پاریسٹ:
فصَّلت من جلد النساء عباءۃ زالبول سِل آن ای اسہ عبا اس گنڈانٹ
وبنیتُ اھراماً من الحلمات و سرون تیا خد آتا کیہی اہرام ٹہیفینٹ
لم یبق نھدُ ابیض۔۔۔ او اسود دنو گوْر اس سلتئو، پیہن۔۔۔ نہ موْن
الا زرعتُ بارضہ رایاتی ہرانا زمین آ ای تینا بیرک ءِ جِک کتنوٹ
لم تبق زاویۃ بجسم جملۃ اسہ زیبا بدن ئسے آ اسہ دنو ہند اس سلتئو
الاومرت فوقھا عرباتی ہراڑا کنا سواریک گدرینگتن ءِ
ہراتم ای دا شئر تے پاریٹ گڑا مخلوق دادے کنا پارہ غان ڈو ءِ مننگ تون ہمگرنچ کرے، و کنے آ ہمو نرینہ شہریار نا ڈول پھبی لعنت ملامت کریر۔ ہرا بندغ آک کنا تُغ ہند ءِ خنانو اوفتے سما ءِ، داٹی بیدس اسہ بیرم، اسہ ہِس دان، اسہ چنکو لیمپ، اسہ قلم، اسہ رجسٹر، ہراٹی تیوہ غا نظم آتا بیدس سرپد مننگوک نوشت آک مریرہ، پین ہچس نہ۔ کنتون کس ءِ کسفنگ نا کن نہ خنجر ارے، نہ زار نا دُنگ و نہ کس ئنا کسفنگ نا چَم آک۔ زیبا تے کسفنگ کنا پیشہ اف؛ کنا پیشہ تو اوفتا پرستش ءِ۔ اگہ ای تینا عشق نا متکنا کُنج آتے اُریو گڑا ای زیات رومانوی آزموندہ غاتیٹ تینے خوْنی نہ کسفنگوک، و تڑوک نہ بلکن تڑنگوک خنوٹ۔
نرینہ نا عادت ءِ کہ او عشق نا معاملہ غاتیٹ بیرہ تینا سرسہبی تا ہیت ءِ کیک و عشق ئٹ مروک تینا بے سُہبی تیا چھپ مریک۔ اونا غرور اودے دا پاننگ نا موْکل تفک کہ اسہ زالبول اس کنے شیڑتیفے، یا اسہ زالبول اس کنے بہا کرے۔ گواچن دادے کہ کنے ہروخت زالبول لتاڑار، اسٹ آن زیات آک بہا کریر یا پِن کٹنگ کن پول ئنا ڈول کاریم اٹ ایسر، یا کنے چُک آنبار پنجرہ ئٹ بند کریر کہ ای اونا زیبائی نا باگل پاؤ و اونا تینا بُلینگ آ اودے خوْش کیو، یا گڑا دا زالبول کنے اسہ اندنو ڈاکیہ ئسے نا ڈول کاریم اٹ ایسر ہرا سُہب و بیگہ اوفتیکن مابت نامہ ارفوک پیری کریسہ مرے۔ دا تیوہ غاتیان گڈ ہم، دا نرینہ شہریار چھپ مس۔ او تینا ڈکھ و بے سہبی نا خرینی تے ڈھکوک مس، انتیکہ او چائسکہ کہ مخلوق اونا ہیت آ باور کپرو کہ اونا خنجر زالبول تا بدن تیا خلنگتئو بلکن او خنجر تو اونا جند ئنا بدن ءِ ہریسہ کرے۔ کنا خڑک شہریار دا تیوہ غا ڈو تیا بشخوک ءِ ہرافک اوڑتون گنڈنگانو؛ اودے حق دوئی ءِ کہ تینا مقدمہ ءِ اسیکہ وا چلیفے و اوڑا پامداری نا خواست کے۔
ہراتم مسٹمیکو صدی ئٹ اونا مقدمہ، علمِ نفسیات نا رِدئٹ، اسیکہ وا ملنگو گڑا دا ہیت پاش مرو کہ او خونی اَلو بلکن اُست خلنگ و بیزاری آ نرینگ کن، تینا حرم، نوکر چاکر، و ہمو درزن آ بدن تیان بیزاری آن دو خلاسی کن، خوْن آ بے وس مسوسس ہرا ہر نن اونا مونا بینگنی ءِ ودیفوک کُننگ نا ڈول مونا ہتنگارہ۔ شہریار اسہ فنکار اس ئس، اسہ بندغ اس ئس، و او – اونا شخصیت اٹ تیوہ غاتیان اہم آ گڑا اندادے – عشق نا معاملہ غاتیٹ یک نظری ئس۔ او تینا وجود نا کڑمبی تیٹ زالبول نا پٹ و پول کریسہ کرے؛ اندنو زالبول ئسے پٹ و پول ہرا اوڑتون مابت کے، دا سوب آن آخہ کہ او بادشاہ ءِ، نہ دا سوب آن کہ او طاغت تخوک و سلطان ءِ، بلکن بیرہ اونا ذات تون مابت کے۔ ہر نن اونا مونا بدن نا دعوت کننگاکہ ہرا اونا بد بننگ و لاڑ ءِ پین ودیفیکہ، زالبول تا بدن تیٹ پیہوک اونا تلوار بے چسی ءِ کسفنگ نا اسہ رمز آن بیدس پین انت ئسے۔
شہریار نا ڈول، زیاتی کنے بدبننگ و بیزاری نا گواچی کرے۔ ہراتم کنا زند ئٹ زالبول تا کچ زیات مسکہ، کنے ٹی ناولدی و تنیائی نا گمان ترندی تا پارہ غا ہناکہ۔ ڈو نا دا مارنگ لندن ئٹ (1952-1955) تینا ایسری تیا سرمس؛ ہراتم ای اسہ زالبول ئسے رخصت کریٹہ، ای ہوغیسہ تینا بیرم آ ہناٹہ تماٹہ، و کنا گُٹ ڈکھ آتا سور آ سمندر تیان پُر مسکہ۔ شہریار نا ڈول، ای ہم اندنو زالبول ئسے پٹیسہ کریٹ ہرا کنا ذات تون مابت کے، دا سوب آن آخہ کہ ای اسہ پِنی شاعر ئسے اٹ ہرادے ہر پارہ غا آمخی و سیخائی پلویڑ کرینے:
احببتِی شاعراً طارت قصائدہ نی کنے شاعر نا ڈول ئٹ دوست تخاس، ہرانا نظم آک ہر پارہ غا تالان ءُ
فحاولی مرۃ ان تفھمی الرجلا گڑا اسہ وار نی نرینہ ءِ سرپد مننگ نا کوشست کہ
وحاولی مرۃ ان تفھمی مللی اسہ وار کنا بیزاری ءِ سرپد مننگ نا کوشست کہ
قد یعرف اللہ فی فردوسہ المللا بلکن خدا تینا فردوس ئٹ (ہم) بیزار ءِ درشان کے
انت نم داسہ سرپد مننگ کیرے کہ شہریار نا ٹپ آک اخس کڑمب ءُ؟
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔