بلوچستان اٹ آن لائن خواننگ
دی بلوچستان پوسٹ سر گپ
چیئرمین ہائیر ایجوکیشن کمیشن پاکستان طارق بانوری ہژدہ مارچ آ دا پڑو ءِ کرے کہ اوتا ادارہ مچا یونیورسٹی تے آن لائن کلاس آتا کرفنگ نا پارینے۔ او دا ہم پارے کہ ایچ ای سی انٹرنیٹ نا آسراتی ءِ تروکا کمپنی تیان خواست کرینے کہ او یونیورسٹی بینڈ وڑتھ اٹ ودکی کیر کہ آن لائن کلاس آتا نیامٹ ہچو ہڑاند اس ودی مف۔
اندن آن لائن کلاس آتا بنا پنجاب کونہ علاقہ ٹی مروک خننگ مریک ہراڑے انٹرنیٹ نا آسراتی اسے ناپید ءُ گڑاس آخہ بلکہ ہردیئی کاریم اٹ ہتوک گڑا اس مسُنے۔ ولے بلوچستان کونا ڈغار ہرا زند ئنا بنماسی آ آسراتی تیان ہورک ءِ، اوڑے بورڈ و قلم آن بدس پین اسے ہم ذریعہ ٹی خواننگ نا ہیت ءِ کننگ ایلو جہان نا ہیتس لگک۔ بلوچستان اٹ خواننگ نا بد آ حالیت دا حساب آتیان جون خلنگ مریک کہ بلوچستان اٹ بیرہ 38 فیصد نرینہ خوانندہ سرپد مننگرہ۔ نیاڑی تے اٙٹ 18 فیصد تون دا حالیت پین گندہ ءِ۔ او داہم یات مرے بلوچستان اٹ خوانوک ہمودے پاننگک ہرا بیرہ نوشت و خواننگ چائک۔
بلوچستان نا بد آ خواننگ نا بست و بند ءِ مونی تخیسہ اوننگے گڑا بلوچستان اٹ آن لائن کلاس نا مطلب دادے کہ دا خوانندہ تیکن ہم سختی تے زیات کننگے ہرا کم کچ اٹ گیشتر خواننگ کن اُراغان پیشن مریرہ۔ ضلع کیچ ہرا بلوچستان نا ہرٹمیکو بلا ضلع ءِ اسے وخت ئسے آن تھری جی و فور جی انٹرنیٹ آن دا پاریسہ ہورک کننگانے کہ داڑے سیکورٹی نا خلیس آک ساڑی ءُ۔
اندہ وڑ ضلع پنجگور، قلات و مستونگ ہم تدوکا پنچ سال آن تھری جی و فور جی انٹرنیٹ آن ہورک ءُ۔
اندا پِن کروک ضلع غاک بلوچستان نا شاری و زیات آباتی والا علاقہ غاک پاننگرہ۔ ہراڑاسکا خلقی علاقہ غاتا ہیت ءِ اوڑے فون نا بنیاتی آسراتی ءِ ہم تیکن بخت اس سرپد مننگک۔ ہمو بلوچ خوانندہ آک خاص وڑ اٹ کراچی یا پنجاب نا یونیورسٹی تے آن واپس بلوچستان آ بسونو کل آن زیات زیمی مرورک۔ انتیکہ اوتا یونیورسٹی آک اوتا حالیت آن بے سما مریسہ کورس ءِ شینک کیرہ۔
بیست و چار مارچ آ پاکستان ٹیلی کمیونیکیشن اتھارٹی اسے بیان اس شینک کریسہ پارے کرونا وائرس نا سوب برجاء لاک ڈاون آن گڈ انٹرنیٹ نا کاریم اٹ پانزدہ فیصد ودکی بسونے۔ او مستی پاریر کہ کوالخواک دا ودکی و انٹرنیٹ نا کاریم اٹ اتنگ نا مننگ کروک ودکی ءِ سیبو تننگ نا لائخی تخرہ۔ است خوشی نا ہیت دادے کہ ہرا کوالخواک انٹرنیٹ نا کاریم اٹ دا ترندا ودکی نا باریم ءِ ارفنگ نا لائخی تخرہ۔ اوفک ہمیش بلوچستان نا پدماندہ غا علاقہ آتیٹ انٹرنیٹ سر کننگ آن تینا دوتے کُفت آتیٹ خلوک خننگانو۔
واہم دا تیوی ساڑی دروشم ئٹ گچینا ہیت دا مونا بسونے کہ بلوچستان نا ہمو خوانندہ آک ہرا کوئٹہ یا خضدار کونا علاقہ آتیٹ ہندی ءُ، ہراڑے انٹرنیٹ جوانے، انٹرنیٹ نا کمک ئٹ مخلوق تون احوال کننگو و کرونا کونا جہانی دین آن بچنگ کن آن لائن سیمینار ہڈ تننگو۔
ہراتم اسکان بلوچستان نا بڑز پِن کروک ضلع غاتیٹ انٹرنیٹ نا آسراتی واپس ہتنگپک او وخت اسکان بلوچستان اٹ آن لائن کلاس آتا بناء خوانندہ آتیکن کمکار مننگ نا جاگہ غا جنجال اس مرو ءِ۔