پاکستان نا وزیر احوالکار عطااللہ تارڑ دعویٰ کرینے کہ بالی و ڈرون آتا وسیلہ ئٹ اوغانستان ئٹی دہ ہندنو جاگہ غئے سہی ءُ جلہو کننگانے ہرا ڈرون خسنگ نا گدام کننگ کن استعمال مننگ ٹی ئسرہ۔
پاکستان نا پارہ غان دا جاگہ تا خوڑت ڈس تننگتئو واہم دا جلہو آک ہندنو وخت ئسے ٹی مسر کہ اسہ دے مہالو پاکستان نا سرکاری چینل آک سیکیورٹی وسیلہ تا رد ئٹ رپورٹ کریسر کہ پاکستان چار شمبے کن سہب ئنا اوغانستان آن تینا آسمانی حد اویل آتیٹ پیہوک ہشت ڈرون ءِ خلکونے بٹینے۔
پنچ شمبے نا سہب اکن دا پڑو آن پد اوغانستان نا خبر تروک تلہ طلوع خوست نا گورنر نا کالخواہ مستغفر گربز نا رد ئٹ رپورٹ تسونے کہ پاکستان نا جلہو آک ننکان سئے و نیم بجہ غا مسر و ضلع گربز نا علاقہ کمپ گلان آن بیدس ضلع اسماعیل خیل و مندوزی نا بھاز علاقہ تے ٹک کرینو۔ دا فتا رد ئٹ جلہو تیٹی ہچ وڑ ئنا جون تا نسخان متنے۔
اوغانستان نا طالبان حکومت نا پارہ غان جلہو ئٹ ٹک مروک ایلو جاگہ تے داسکان پک کننگتنے، واہم گیٹی امیجز خبر تروک ادارہ اے اے ایف پی نا تروک گڑاس عکس ءِ شینک کرینے ہرافتیٹی قندھار ئٹی بالی جلہو تیان پد خاخر و مول اس بڑز بش مننگ آ خننگک۔
سوشل میڈیا تلہ ایکس آ پوسٹ ئسے ٹی وزیر اطلاعات دوبہ خلکونے کہ درو اوغان سرزمین آن پاکستان آ ڈرون رادہ کننگاسر۔
عطا تارڑ نا رد ئٹ دا پاکستان نا خود مختاری و علاقائی سوگی نا چٹ برخلافی ئسے و تادی کننگ نا اسہ بھلو امنا مفروکو عمل ئسے۔
یات سلے کہ درو پاکستان نا سرکاری وسیلہ غاک سیکیورٹی نا رد رپورٹ کریسر کہ چار شمبے ۲۳ ستمبر نا سہب اکن پاکستان نا اسمانی حد اویل ئٹ اوغانستان آن پیہوک ہشت ڈرون ءِ خلکونن بٹینن۔
سرکاری وسیلہ تا رد ئٹ دا ڈرون آک اوغان طالبان نا ئسرہ، ہرافتیٹی چار طور خم سیم آن خڑک علاقہ تیٹی خلنگا، ایلو چار ئٹ کوہاٹ نا خڑک سیم و مش تا علاقہ تے ٹک کننگا۔
واہم اوغانساتان طالبان حکومت نا وزیر رکھ نا کالخوا صدیق اللہ نصرت دا دوبہ غان دو کشا کہ اوغانستان نا پارہ غان ہشت ڈرون پاکستان نا اسمانی حد اویل ئٹی پیہانو۔
داکان مہالو دوشنبے ۲۱ ستمبر آ پاکستان دعوی کریسس کہ او پک انگا ڈکوک حوال آتا بنیات آ سیمی علاقہ تیان خڑک اوغان علاقہ تیٹی تحریک طالبان پاکستان و اوفتیان خڑک تولی تا وتاخ آتے یک پہ ٹک ٹک کرینے۔ ہراٹی کیہی جند ندر آتیان بیدس ۲۸ شدت پسند مرک ئنا گواچی مسنو۔
ہندا دے اوغان طالبان حکومت نا سروک ذبیح اللہ مجاہد ایکس آ پوسٹ ئسے ٹی پارے کہ اوغان اولس دا تادی تا جوانو ورندی اس ترو۔
واہم بی بی سی تون حوال کریسہ اوغان وزیر رکھ نا سروک صدیق اللہ نصرت دا ہیت ءِ رد پاتے کہ پاکستان نا جلہو نا رد عمل ٹی اوغانستان ہم پاکستان نا زی آ ڈرون خسانے۔
بی بی سی تون تران کریسہ او پارے کہ اوغان بالی انتظامیہ داسکان ہچو ڈرون جلہو اس کتنے و ورندی ٹی کاروائی نا وخت و چم ءِ او تینٹ جوڑ کرور۔