سوشل میڈیا غا تالان اسہ ویڈیو سیٹی فورس نا کارندہ غاتے نیاڑی تا زیا بے دادی کننگ ءَ خننگ مریک۔
دی بلوچستان پوسٹ سوشل میڈیا مانیٹرنگ ڈیسک نا حوال تا رِد ئٹ سوشل میڈیا آ اینو اسہ تالونو ویڈیو سیٹی خننگ مریک کہ پاکستانی پیرا ملٹری فورس فرنٹیئر کور اسہ بلّو کچ اسیتون گوادر شار نا علاقہ موسیٰ موڑ آ ساڑی ءُ و بلوچ نیاڑی تیا بے دادی کننگو۔
مبائل فون آن جوڑ کروکا دا ویڈیو ءِ کم و وَد سد میٹر نا مرّی آن جوڑ کننگانے، ویڈیو ٹی فورسز نا چار لاری و ایلو بھاز آ سلاء بند کارندہ آک پاش خننگرہ۔ و دیخہ مُر درزمن ئسے نا کچ بلوچ زالبول چیہانٹ خلیسہ خننگرہ۔
ویڈیو ءِ جوڑ کروکا بندغ نا چاہنداری دہسکان مننگ کتنے ولے دا ویڈیو ٹی دا نا درست بندغ ءِ بلوچی زبان ٹی دُن پاننگ ءَ بننگ مریک کہ ”نیاڑی تے خلنگ ءُ، فوج نیاڑی تے خلنگے، فوج کس ءِ مونی ہننگ کن ہلینگ اَف و نیاڑی تے لٹ تننگے، نیاڑی تیتون دا واڑ بے دادی کننگ بھاز خراب ءِ۔
دہسکان دا واقعہ نا گیشتری حوال رسینگتنے کہ بلوچ نیاڑیک گوادر موسیٰ موڑ آ انتکن مُچ ئسر، پولیس نا بدل ئٹ فوج اوڑے انت کریکا، ایلو نیاڑی تیا انتئے بے دادی کننگ ئسر۔
یاتی مرے اندا سال تیٹ بلوچستان ٹی بلوچ نیاڑی تیا فورسز نا پارہ غان بے دادی، اوفتے قانود آن چپ دزگیر کننگ، و زورٹ بیگواہ کننگ نا واقعہ تیٹ خلیس نا ہد اسکان ودّکی بسونے۔ دا رد ئٹ بیگواہ بندغ تا یلہ کرفنگ کن نت دُو خلوک گَل وائس فار بلوچ مسنگ پرسنز، انسانی حقوق نا تنظیم آک و بلوچ قوم پرست جماعت آک برجاء برانز ارفیسہ بسنو۔