بیگواہ بلوچ صحافی
دی بلوچستان پوسٹ سرگپ
بیست و ہشت مارچ جمعہ نا دے آن لائن اخبار بلوچستان ٹائمز دا ہیت مونا ایس کہ اوفتا چیف ایڈیٹر ساجد حسین 2 مارچ 2020 آن بیگواہ ءِ۔ 39 سالہ بلوچ صحافی تون گڈیکو وار‘ دو مارچ نا دے یانزدہ بجہ غا سویڈن نا شار اوپسلہ ئٹ حوال مسوسس۔
انٹرنیشنل فیڈریشن آف جرنلسٹس نا دا بابت پاننگے کہ ”ساجد حسین ءِ کسیفنگ نا تڑی رسینگ، اُرا غا چھاپہ، خاہوت و جند آ بھاز اوننگ و سروسوج آتا سوب آن 2012 ئٹ پاکستان آن نراسس۔ ساجد 2012 آن 2017 نا نیامٹ اومان، متحدہ عرب امارات و یوگنڈا ٹی زند گدریفینے و ایسری ئٹ او سویڈن اٹ باہوٹ نا خواست تس۔
خیال آتا درشانی نا آزاتی و معلومداری تے اسکان سرمننگ نا حق ئنا رکنگ نا منوک جہانی ادارہ ”رپورٹرز ود آؤٹ بارڈرز“ ساجد حسین نا بیگواہی نا دوبہ ءِ پاکستان نا ڈھکوک ادارہ انٹر سروسز انٹیلیجنس (آئی ایس آئی) آ خلکنے۔
بڑز پن کروک تنظیم ہرا جہانی وڑٹ ”رپورٹرز ساں فرنٹیئرز“ نا پن آن ہم چائنگک، دوبہ خلیسہ پارینے کہ اوفتا ڈھکوک ذرائع آن دوئی مروک معلومداری تا رِدئٹ پاکستان تون اختلاف تخوک مخلوق نا اسہ لَڑ اس ہرا داسہ جتا ملک آتیٹ باہوٹ ہلوک زند گدریفنگ ءُ، آئی ایس آئی نا تہہ ئٹ پیری کننگے۔
اندنو واقعہ اس 2018 اٹ ہم مونا بسوسس، ہراتم بندغی حق آتیکن کاریم کروک راشد حسین متحدہ عرب امارات آن اماراتی ڈھکوک پولیس نا دو آن دزگیری آن گڈ بیگواہ مسوسس۔ جتا پَک ذریعہ تیان رسینگوک حوال تا رِد ئٹ اودے اسہ پرائیویٹ جاز اسیٹی پاکستان ڈی پورٹ کننگاسس ولے اسہ سال ئسے آن زیات گدرینگ آن گڈ دائسکان پاکستانی کوالخواک اودے مونا آ ہتنو۔
واہم سویڈن ئٹ دائسکان سویڈش پولیس ءِ تینا گڈیکو سرسوجی رپورٹ ءِ ساجد حسین نا بابت تروئی ءِ۔ اگہ ساجد حسین نا بیگواہی ئٹ پاکستانی کوالخواتا اواری نا شاہدیک رسینگرہ، دنکہ صحافی گَل آک دوبہ خلنگو گڑا اسہ ہیت اس پاش مریک کہ بلوچستان نا حالیت آتے نشان تروک بلوچ صحافی و بندغی حق آتیکن کاریم کروک آتیکن جہان نا ہچو کنڈ اس رکھوک اَف۔
اسہ پنی ءُ کردش وساہت اس”مَش تیان بیدس ہچو سنگتس اَف“ کرد آتا ہمو بد آ حالیت و مہذب آ راج آتا پارہ غان نا امیتی نا درشانی ءِ کیک ہراتم سخت حالیت آتیٹی اوفک مہذب آ راج آتیٹ ہچو سنگتس خنتور گڑا اوفک تینا مَش تیتون سنگتی کریر۔ دنکہ بلوچستان تون اوار تیوی جہان ئٹ بلوچ نشان مننگے، دا ہیت ئنا خلیس ءِ کہ بلوچ ہم اندا ایسری آ سرمرو کہ ”مش تیان بیدس ہچو سنگتس اَف۔“