دیکی بلوچستان اٹی تدوکا منہ وخت آن سم کاری نا واقعہ غاتیٹی دے ٹکی بلوچستان آن تعلقداری تخوکا بھاز آ بندغ آک خلنگانو۔
ٹی بی پی نا نمائندہ نا حوال ت رد ئٹ نا درست آ سلاء بند بندغ آک دیکی بلوچستان نا علاقہ سراوان ٹی سم کاری کریسہ اسہ بندغ ئس کسفیر۔
سراوان نا علاقہ احمد آباد اٹی کسفوکا بندغ نا درستی عبدالواحد مار شفیع محمد نا پن اٹ مس ہرانا تعلقداری دے ٹکی بلوچستان نا علاقہ پشتکو ٹوبائی واشک آن ءِ۔
دائسکان کسفنگ نا سوب آک سما تمتنو۔
دیکی بلوچستان ٹی سم کاری و کسفنگ اتا پد مہ پد مروکا واقعہ غاتے آن پد رسینگوکا حوال آتا رد ئٹ ایران نا فوجی کوالخواک شابیتی ئٹ چھاپہ و دزگیری نا لڑ ءِ بنا کرینو ہراٹی دائسکان سراوان، چابہار و ایلو علاقہ تے آن بھاز آ بندغ آک دزگیر مسونو۔
دائسکان دزگیر مروکا بندغ آتا پن تے ایران نا کوالخواک پاش کتنو۔