بلوچستان نا ضلع قلات نا مشی آ علاقہ شور پارود و خاران نا نیامی علاقہ ٹی سلاہ بند جھڑپ اسیٹی بی ایل اے نا اِرا سرمچار کذیت کریر۔
پاکستانی فوج و ڈیتھ اسکواڈ نا کارندہ غاک علاقہ اٹ پیہار، سمالو نا علاقہ ئٹ بلوچ آزاتی خواہوک سلاء بند آتون اوفتا جھڑپ مس۔
بلوچ لبریشن آرمی نا ترجمان جیئند بلوچ میڈیا ٹی حوال اس شینک کریسہ پارینے کہ قلات و خاران نا نیامی علاقہ شور پارود ئٹ بی ایل اے نا پاکستانی فوج و اوفتا گندہ کار بندغ آتیان ٹہیفوک ڈیتھ اسکواڈ نا کارندہ آتیتون جھڑپ مس۔ گھنٹہ آتے اسکان برجا جنگ ئٹ بلوچ لبریشن آرمی نا اِرا جانباز سرمچار شاہ داد بلوچ پن کروک درّا‘ و احسان بلوچ پن کروک شاہ داد دلیری تون مون تریسہ شہید مسر۔
جیئند بلوچ نا پاننگے کہ شہید شاہ داد بلوچ و شہید احسان بلوچ تدوکا اسہ سال آن بلوچ لبریشن آرمی تون اوار ئسر، ہڑتوما شہید آک سوگو آ نظریہ و برجا عمل تون تفوک ئسر۔ چنکو وخت اسیٹی اوفک قومی آجوئی کن بے بہا کاریم ایسری تسر۔
اونا مُستی پاننگے کہ دشمن تون جھڑپ نا وخت براس نا جانثار سنگت آتون اوار ہمراہ تنظیم یونائیٹڈ بلوچ آرمی نا سرمچار آک سرمسر، ہرافک پاکستانی فوج و ڈیتھ اسکواڈ نا کارندہ غاتیا ڈغار ءِ تنک کریر، اوفتے بھاز نسخان تسر و اوفتے نرنگ آ بیوس کریر۔
جیئند بلوچ نا پاننگے کہ بلوچ لبریشن آرمی نا جنگ آجو بلوچ وطن نا ٹہیفنگ کن نہ بیرہ پیشن نا جلہو کرور دشمن تون ءِ بلکن دشمن نا کوزہ ءِ طاغت بشخوک اونا ہمراہ ہندی بہا مروک غلام آتیتون ءِ ہم۔ ہرافتے ہچو وڑ اسیٹ بلوچ مننگ نا سوب بشخنگپرو۔ دا تیوی ضمیر سودا کروک وطن بہا کروک قومی غدار، ریاستی ایجنٹ، میر و معتبر آتے ہم زوت عبرت نا نشان جوڑ کرون۔
انداڑ تون اسہ پین بلوچ سلاہ بند آجوئی خواہوک تنظیم بلوچ ریپبلکن آرمی نا ترجمان بیبگر بلوچ حوال اسیٹی پارے کہ تنظیم نا ارے نا سنگت سنیر بلوچ تدوکا دے تیٹ دیکی بلوچستان ئٹ دشمن تون مڑ تریسہ شہید مس۔ ورنا سنیر چنکی آن تنظیم تون اوار مسوسس، او دشت و ایب کیب ئٹ دشمن نا مونا گچینو کاریم ایسری تننگ ئٹ بشخ ہلک و دشمن ءِ نیست کرے۔
بیبگر بلوچ پارے کہ تنظیم شہید سنیر بلوچ ءِ دستا ورنا نا پن ایتک۔