مرک – حفیظ شہزاد

مرک

نوشت: حفیظ شہزاد

دی بلوچستان پوسٹ

اسے کُنڈا مخلوق ٹی گلوبالی اس پہنگ ئس انتیکہ مخلوق روچہ غان مُست نا سے لاک ڈاؤن تو مشغول بین، لنگڑی، فریشانی و کہی بڈ آتے تینا کوپہ غا ارفیسر تہٹی بور بور ئسر۔

حوال تیٹی بس کہ اینو لاک ڈاؤن ایسر مسونے۔ روزگار آک ملنگانو، دہاڑی کروکاتا با گلانی آن مُچ متوکہ۔ ہرکس تینا کاریم کے گلان اس انتیکہ روچہ آن مُست گزران مسکہ، روچہ بنا مننگ تون منہ دے دکاندار وام تس تا ولدا دکاندار ہم بیزار مس کہ داخس وام ایتیوہ اگہ روزگار آک ملنگتور کنے پیسہ ہراکہ ہتور ایتور۔

اوکہ پد غریب آ دہاڑی کروکاک خنتے ٹپار، ارا والا تا مونا بیوس مسر۔ داسہ مچے دم تہ راست مس او پیش تمار کاریم نا کُنڈا، فیکٹری اوفتا شار ان مچے ہیمون ئس، کسر تا قبرستان نا نیام آن پیشن مسکہ۔

زمان خان تینا مُتکنا چوٹ آتے بینا و سر ہلک۔ قبرستان آ خنا کہ بجلو مُچی ئسے۔ اندا گمان کرے کہ اسے وار تینے جنازہ غا ساڑی کیو دعائے مغفرت اس ہم کیو انت سماء اللہ پاک ننا و دا کل بندغ آتا سوب آن مسکین نا مغفرت ءِ کے۔

او ہنا سر مس و ایلو کاریم کروکاتون ہم کوپہ مس، لحد ءِ خلکر۔ میت ءِ ایسر مونا تخار ولدا مولوی صاحب توار تس کہ

صف آتے برابر کبو۔

اللہ اکبر۔۔۔۔۔۔۔۔

مولوی صاحب اللہ اکبر پاریسوس کہ بمب نا دریمبہ مس۔ جہان نا رنگ اڑسینگا آسمان نہ رنگ پوشکن مس، کُل زند آن بے بخت مسر۔۔۔۔۔

ہفتددہ میکو روچہ ئس۔ بمب نا توار آن ایلو خُڑک مُر نا مخلوق تینے سر کریر و شہید آتے کُل ءِ اریسہ، ہرکس ہراڑے تموک ئس امو جاگہ غا کڈ کریر۔۔۔۔۔

انا للہِ وَ اِنہ اِلیہِ راجعون