بلوچ چاگڑد نا پد ندارہ
نوشت: زائم بلوچ
دی بلوچستان پوسٹ
چاگڑد انت ئسے؟ کُل آن مُست دا سوج ئنا ورندی ئٹ نن دا پانہ کہ انفرادی ڈول ئٹ اسہ چنکو یا بھلو ٹولی اس ہرافتا جغرافیائی، سیاسی، معاشی و ثقافتی اواری مرے تو او چاگڑد پاننگک۔
اندن اسہ راج ئسے نا ڈغار آ اونا دود و ربیدہ، بولیک و دیہاڑ گیشتر پریکٹس مرے تو او چاگڑد ہمو راج ئنا راجی چاگڑد پاننگک۔
اگہ نن بندغی دیہاڑ ءِ ہُرن گُڑا مدام بندغ آک تینا زند ءِ شون تننگ نا جہد ئٹ اختہ ءُ، ہر دور ئٹ ہر بندغ نا جہد اونا زند اکن پاش مریک۔ اندن بندغ نا زند ئٹ ودکی اتنگ نا راز چاگڑد تون تفوک ءِ۔ چاگڑد ئٹ بندغ آک اسہ راج ئسے نا ڈول زندگانی کیرہ، لس وڑ ئٹ دن پاننگ کینہ کہ اسہ راج ئسے نا شونداری نا راز اونا چاگڑد تون تفوک ءِ۔
ہر دور ئنا بندغ آتا زند ئنا دروشم جتا مسونے، بندغ نا دیہاڑ ئٹ اولیکو دور ئنا بندغ اگہ تینا زند ءِ شون تننگ و پِڈ ئنا پری کن شکار کرینے ولے اوکان پد بروکا دور ئنا بندغ شکار آن شونداری کریسہ کشت و کشار نا نیمہ غا بسونے اندن ہر پوسکن آ دور ئنا بندغ ایلو سلوکا دور ئنا بندغ آتیان گیشتر شونداری کرینے۔ دا ڈول ئٹ مُست ئنا بندغ آک، راج آک تینا چاگڑد آتیٹی ودکی اتیسہ تینا زند ءِ سرسہبی نا نیمہ غا کسر تسونو۔
اسہ راجی چاگڑد اس راج ئنا باتی تے بے نوشتہ ءُ قانود ئسے آن و راج ئنا دود و ربیدہ و بولی تا درس ایتک۔ بندغ تینا چاگڑد آن تینا زند ئنا کل آن بھلا تربیت ءِ الیک۔
اندن بلوچ چاگڑد ہم جہان نا مُست ئنا عظیم انگا چاگڑد آتیان اسٹ ءِ۔ اینو آن یانزدہ ہزار سال مُست کچھی نا دامان مہرگڑھ آن بلوچ باتی تا چاگڑد ئنا بنا مس۔ بلوچ باتیک ہرا یانزدہ ہزار سال مُست تینا تہذیبی، چاگڑدی، معاشی و سیاسی زند ئنا بناء ءِ کریر، ہرا برصغیر ایشیا نا اولیکو چاگڑد آتیان اسٹ نا دروشم ئٹ جہان نا مون آ بس۔ بلوچ چاگڑد ئٹ جہان نا بھلا شکاری آ بندغ تا ودی مننگ نا دیہاڑی شاہدیک اریر۔ اندن بلوچ چاگڑد نا ایجاد آتیان برصغیر ایشیاء ئٹ بھلو کچ اسیٹ دیمروی بسونے۔ بلوچ چاگڑد مدام مزاحمتکار، جنگول، راہشون، پہلوان و دستکار دیہاڑ نا ہر کرن ئٹ ودی کرینے۔ بلوچ چاگڑد ئٹ بریبری، انصاف، رواداری، دلیری، مہمانداری و چندی پین دود آتا سفت آک دیہاڑ نا پنہ غاتیا نوشتہ ءُ۔
بلوچ آک ہرا قبائل تا بنیات آ بشخوک دا ڈغار نا خواجہ غاک ءُ، اندن تینا سیاسی ڈھانچہ (political structure) ءِ ہم قبائل آتا بنیات آ مستی دریسہ تینا چاگڑد ءِ شون تسونو۔ ہر قبیلہ نا اسہ لائخ ءُ سڑدار، نواب، میر، ٹکری یا ایلو سرخیل تا گچین کاری بلوچ چاگڑد ئٹ بلوچ نا سیاسی مزاج نا شاہدی ایتک۔ بلوچ چاگڑد ئٹ بھاز آ بلوچ قبائل آتا زالبول سرخیل آک مسونو ہرا بلوچ چاگڑد نا بریبری عدل و انصاف نا سوگو آ شاہدی ءِ۔
برصغیر ایشیاء نا زی آ بلوچ قبیلہ کاشانی تا پنچ سد سال ئنا حکمرانی مسونے ہراٹی کاشانی قبیلہ نا جتا جتا غا حاکم آک حکومت کرینو۔ اندن ایشیاء غا بلوچ قبیلہ آسکانی تا ہم چار سد و پنجاہ سال نا حکومت نا دور اس مسونے۔ دا کل دیہاڑ بلوچ نا لائخی، دلیری و سوگوی نا گواہی ایتک۔ بلوچ راج نا سوگوی نا گمان داکان خلنگ مریک کہ جہان نا اولیکو تاریخ دان ”ہیروڈوٹس“ نا کتاب ئٹ ہم بلوچ راج ئنا بھلو دیہاڑ اس نوشتہ ءِ۔
بلوچ آک ہرا برصغیر ایشیاء نا اولیکو باتیک ءُ کہ ہرافک Agriculture , Medical & Arrigation system نا بنا ءِ کروک آک ءُ۔ جہان نا ہرا وخت معاشی وسیلہ شکار ئس تو بلوچ آک تینا خاہوت آتا پڈ پری کن شکار کریرہ و اُرا و گدان آتیان پیشن جنگل و مَش تیٹی گیشتر مسورہ۔ گُڑا اندا وخت آتیٹ بلوچ زالبول آک تینا ناجوڑی تا ایسری کن پٹ و میدان تیٹ بوچ آتا دریافت ءِ سرسہبی ئٹ کریر، اندن مدان مدان کل ایشیاء ئٹ مخلوق تینا ناجوڑی تا ایسری کن اندا دارو تے کاریم ئٹ اتیسہ کریکہ۔
بلوچ آتا آباتی گیشتر مریسہ ئس و اوفتا پِڈ ئنا پوروی شکار آن مننگ الو گڑا دافک تینا ڈغار آتیٹ اولیکو کشت و کشار ءِ کریر۔
بلوچ نا بھلا مسٹمیکو ایجاد ایریگیشن ہرا نا گرج بلوچ ءِ ہمو وخت تما ہراتم بلوچ آتا آباتی ئٹ جوان ودکی بسوسس۔ بلوچ آتا کچ ئٹ کشت و کشار آن گزارا مننگ الو۔ بلوچ باتی تیتون ڈغار بھاز ئس ولے کل اندن تموک ئسر ہرافتے دِیر ئنا کمبوتی یا ہچ نہ مننگ نا سوب کشت و کشار مننگ کتوکہ۔ گڑا بلوچ آک تینا ڈغار تیا دیر سر کننگ کن ڈغار نا شیف آن کاریز جوڑ کرسہ درہ غاتیان ڈغار تے اسکان دیر سر کننگ نا بست و بند ءِ کریر ہراڑان چاگڑد ئٹ معاشی جیڑہ غاک ایسر مسور و ایریگیشن سسٹم نا بنا مس۔
جہان نا ہر چاگڑد ئٹ جوان و خراب اڑتوم آ ڈول آک مریرہ دا ہیت آن کس پانادی اف و جہان ئٹ بلوچ چاگڑد تون اوار بھاز انگا ایلو چاگڑد آک ہم دیہاڑ نا بشخ مسونو، ولے اسہ راستی اس دا ہم ارے کہ بلوچ چاگڑد جہان نا مُتکن و عظیم انگا چاگڑد آتیٹی بریک دانا سوب دادے کہ بلوچ تینا ڈغار، دود و ربیدہ، بولی یا ایلو چاگڑدی و راجی دود آتے مدام زندہ تخانے۔ بلوچ چاگڑد آ جہان نا بھاز آ تاغت ور آ کوزہ گیر تا کوزہ مسونے ولے دافک کل ئنا مون آ سلیسنو و تینا ڈغار و ڈیہہ ئنا رکھ ءِ کرینو، اندن ایلو چاگڑد آتیا ہم بھاز آ کوزہ گیر آک بسونو اوفتا دیہاڑ ءِ مسخ کرینو، بھاز آ راج آتا پجار آ جلہو کرسہ اوفتے منتشر کرینو۔ ولے بلوچ راج جہان نا بھلا تاغت ور آ کوزہ گیر تا کوزہ غان گڈ ہم تینا چاگڑد ءِ پرغنگ کن، تینا پجار ءِ تُڑفنگ کن، تینا دود و ربیدہ ءِ لتاڑنگ کن اِلتنے، بلکن تینا چاگڑدی تربیت ءِ الیسہ مدام تینا راجی دود آتیٹی ہر دور ئٹ ہر کوزہ گیر نا برخلاف منظم و مزاحمتی جنگ اس کرینے۔
اندن کہ اول ئٹ پارین کہ ہر چاگڑد نا جوان و خراب ہڑتوم آ پالوک مریرہ۔ اندا وڑ بلوچ چاگڑد ئٹ ہم گڑاس منفی پالو اریر ولے اوفتا کچ داخس اف کہ بلوچ چاگڑد جہان نا شونداری و گو آن پد سلے یا دا جیڑہ غاتا سوب آن وختی سلیسونے۔ ہرا وخت بلوچ آتا ڈغار آ بلوچ آتا راج و حکومت مسونے تو او وخت ہم اندا جیڑہ غاک ساڑی مسونو۔ ولے اوفک بلوچ چاگڑد نا شونداری نا راز ئٹ ہڑاند متنو۔ بلوچ چاگڑد ئٹ کل آن بھلا جیڑہ دا مسونے کہ بلوچ آک تین پہ تین قبائل آتا بنیات آ بھلو خون ریز ءُ جنگ کرینو، او تینٹ تینا راجی لٹ و پل ءِ کرینو۔ اندا جیڑہ غاتیان چاگڑد ئٹ انا پرستی، ضد و گڑاس پین منفی عادت بلوچ آتا مزاج ئٹ جہی مسونے۔
بلوچ چاگڑد ئٹ جاگیرداری نظام نا ہم گڑاس دیہاڑی شاہدی دُو بریک کہ ہرافتا بنیات آ بلوچ چاگڑد ئٹ تپہ ودی مسونے دا ناسور آ مرض آتیان بیدس پین بھلو چاگڑدی جیڑہ دا چاگڑد ئٹ دن بھاز ساڑی متنے کہ ہرافک بلوچ چاگڑد ءِ اونا ودکی آن پاناد کیر۔
بلوچ چاگڑد ئٹ نیاڑی تا حق خلنگ و نیاڑی تے خون بہا ئٹ تننگ نا ہم اسہ منفی دود اس مسونے ہرا دا راج و چاگڑد نا کل آن بھلا جیڑہ مسونے۔ اندا جنسی برابری نا مننگ نا سوب بلوچ چاگڑد پدی سلیسونے۔
بلوچ آتا تین پہ تین نا جیڑہ غاتا گیشتر سوب دن متنے کہ ہراوڑ سامراج آتا تاریخ دان آک نوشتہ کرینو کہ بلوچ آک ڈغار تا زی آ تینے خلیرہ کسفرہ یا بھاز آک بلوچ ءِ وحشی نوشتہ کرینو۔ دا کل ہمو کوزہ گیر آتا مفاد آتے مون آ تخیسہ دا کسہ غاتے لکھانو، بلکہ راست دا وڑ ءِ کہ بلوچ آتا مزاج نا منفی آ مسخت آتا سوب آن بلوچ آتا تین پہ تین نا جیڑہ غاک بش مسونو۔ انا و ضد نا سوب آن تینٹ تینا لٹ و پل ءِ کرینو۔
بلوچ ہر دور ئٹ تینٹ تینا چاگڑد ءِ جوان سرسہبی تسونے۔ جہان ئٹ ہرا وخت نوآبادیاتی نظام نا دور ئسک گیشتر نزور آ راج آتا زی آ European تا کوزہ و نوآبادیاتی نظام برجاء ئس۔ بلکن او وخت یورپین نوشتکار آک تینا کتاب آتیٹ گمر کرسہ نوآبادی تورینگ ءِ تینا کلچر و تہذیب نا بشخ پاریرہ۔ جہان ئٹ دے کہی ملک آک تینا معیشت ءِ ودفنگ کن نزور آ راج آتا مڈی تے خن ئٹ خلیسہ اوفتیا کوزہ کریرہ و او ڈغار آتے تینا نوآبادی جوڑ کریرہ۔ برصغیر و افریقہ نا ہر ڈیہہ ئٹ یورپ نا جتا جتا غا ڈیہہ تا کوزہ گیریت و نوآبادکار آتا رند و زیم آک دائسکان اریر۔ یورپی ادیب آتا کتاب آتیٹ نوآبادی تیا گمر کننگ و تینا تہذیب نا بشخ پاننگ نا زی آ Aime cesaire نا گچینو نغدی کتاب اس ارے ہرا ”نوآبادیاتی نظام کا محاکمہ“ نا پِن ئٹ اردو ٹی بدل مسونے۔
دے کہی ڈیہہ تا اندا گمر برجاء ئس، بلوچ چاگڑد تینا آزات آ ریاست آتے تینا جند ئنا سیاسی اسٹرکچر ئٹ چلیفسہ ئس۔ اندا وخت آک ئسر کہ برطانوی سامراج ءِ اوغانستان آ کوزہ کننگ کن بلوچ ڈغار نا سخت گرج ئس۔ برطانیہ ریاست قلات آن اوغانستان ءِ کوزہ کننگ کن کسر و کمک خوائس ہرادے ریاست قلات چٹ رد کرے۔ اندا سوب ریاست قلات و انگریز سامراج نا نیام ئٹ جنگ اس ودی مس و ریاستِ قلات نا خان، خان محراب خان تینا سنگت آتون اوار برطانوی سامراج نا برخلاف 13 نومبر 1839 ئٹ تینا ڈغار نا رکھ ءِ کرسہ شہید مس۔ خان محراب خان نا شہادت آن پد انگریز سامراج تینا مفاد آتے دوئی کننگ کن بلوچستان آ کوزہ کرے و بھلو وخت اس گدریفے ہرا 1839 آن الیس 1947 اسکان برجاء ئس۔ دا یک سد و ہشت سال ئنا نیام ئٹ سامراج ءِ بلوچ باتی تا نیمہ غان بھلو مزاحمت ئسے تون مون تروئی تما۔ یوسف عزیز مگسی نا سیاسی جہد و خان محراب خان نا سلہہ بند مننگ اینو ہم بلوچ باتی تے اومیت تریسہ بلوچ جنز ئتو تفیسہ ءِ۔
برطانوی سامراج بلوچستان آ کوزہ ءِ برجاہ تخنگ کن کل آن مُست بلوچ چاگڑد نا دروشم ءِ مٹ کننگ نا کوشست ءِ کرے۔ بلوچ چاگڑد نا نزوری تے گیشتر پریکٹس کرسہ بلوچ ءِ جہان نا مون آ وحشی باور کرفے و بلوچ نا ڈغار آ کوزہ غان گڈ ہم تینے بلوچ نا تہذیبی استاد نا پِن ئٹ جہان نا مون آ ایس۔ کالونیل چم آتے کاریم ئٹ اتسہ برطانیہ سامراج تینا جاسوس آتے ہم بلوچستان ئٹ تالان کرے۔ دا جاسوس آتا کاریم بیرہ بلوچ نا چاگڑد ءِ خوڑتی ئٹ اُرنگ و بلوچ نا دود و ربیدہ غاتے تینا مفاد آتا بابت کاریم ئٹ اتنگ ئس۔ ہراتم اسہ کوزہ گیر اس نزور ءُ راج ئسے آ کوزہ کیک گڑا کل آن مُست اونا چاگڑد ءِ تینا وس ئٹ کیک۔
اندن کارل مارکس پاہک کہ ہراتم اسہ تاغت ور اس اسہ نزور ءُ راج یا تپہ ئسے آ کوزہ کیک گڑا کل آن مُست اونا چاگڑد ءِ مٹ کیک۔ مارکس چاگڑد ءِ اِرا بشخ ئٹ بشخک۔ چاگڑد نا ہرا معاشی پیداواری (Mode of production) ءِ اودے Base structure نا پِن ایتک و اندن چاگڑد نا ہرا دود و ربیدہ، مذہب، و پجار ءِ اودے super structure نا پِن ایتک۔
مارکس پاہک کہ کل آن مُست کوزہ گیر چاگڑد نا base structure آ تینا کوزہ ءِ کیک تاکہ راج ئنا زریعہِ معاش تاغت ور نا دوٹی مرے۔ ہراتم چاگڑد ئنا معاشی پیداواری ءِ تاغت ور دوئی کرے گڑا مون مُستی او چاگڑد نا super structure نا نیمہ غا کاہک۔ کوزہ گیر مدام نوآبادیات نا دود و ربیدہ ئٹ بدلی اتیک، راج ئنا پجار و مذہب ءِ مسخ کرسہ تینا مسخت نا غرض ئٹ جوڑ کیک۔
مارکس نا خڑک اسہ راج ئسے نا super structure ءِ مسخ کننگ کن کوزہ گیر تون کل آن اڑزان آ چال لٹریچر ءِ۔ کوزہ گیر مدام تیوری، خیالات، فلسفہ نا وسیلہ ئٹ نزور آ راج آتا نفسیات ءِ تینا کوزہ ئٹ اتنگ نا کوشست کیک۔ ہراتم اسہ راج ئسے نا چاگڑد کوزہ گیر ئسے نا دوٹی مس گُڑا مدام او تینا مفاد آتا بنیات آ چلیفسہ دیک۔ تاغت ور آ سامراج نا کوزہ بیرہ نزور آ راج نا مڈی تیکن مریک ہرا base structure ٹی بریک، ولے تاکہ سامراج super structure آ کوزہ کتنے او تینا مفاد آتا مزل اسکان سر مننگ آ سرسہب مننگ کپک۔ او مدام مڈی تا لٹ و پل ءِ کیک و نزور ئنا ہر گڑا ءِ مسخ کیک۔ اندن ہر کوزہ گیر نا اولی مفاد نزور آ راج ئنا مڈیک مریرہ۔ ولے او تینا مفاد ءِ دوئی کننگ کن نوآبادیات ءِ تینا دوٹی کیک۔ اینو ہم بلوچستان نا زی آ اِرا ڈیھ ئنا مُون پہ مون کوزہ برجاء ءِ ولے بلوچ ہم اسہ سوگو ءُ مزاحمت ئسے تون اڑتوم آ سامراج آتون اختہ ءِ۔
اینو بلوچ چاگڑد نا عکس دن اف ہرا وڑ وختی مسونے۔ بلوچ ہرا بنیات آ تینا سیاسی اسٹرکچر ءِ جوڑ کرسہ تینا چاگڑدی جیڑہ غاتے ایسر کرینے اینو نوآبادکار بلوچ نا ہمو سیاسی اسٹرکچر ئٹ بدلی اتسہ بلوچ چاگڑد ئٹ ہمو بلوچی دود آتے تینا مفاد آتا بنیات آ شون تسنے۔ چاگڑد نا کل آن بھلا شونکار اسٹ سیاست ءِ ایلو ادب ءِ۔ ادب چاگڑد نا آدینک پاننگک ہرا چاگڑد نا عکاسی ءِ کیک، اندن سیاست چاگڑد نا عکاسی آن پد ہمو چاگڑد ءِ سینگار کرسہ شون ایتک۔ چاگڑد نا base structure نا رکھوک سیاست ءِ و اندن super structure نا رکھ ادب آن مریک۔ اندا سوب سیاست و ادب چاگڑد نا ہمو اڑتوم آ دیوال آک پاننگرہ ہرافتا زی آ چاگڑد نا آٹی تخنگک۔ ولے اینو نا ننا دا چاگڑد ئٹ سیاست و ادب ءِ ہُننگ آن پد اندا گمان مریک کہ دا اسہ کالونیل چاگڑد ئسے نا دروشم ئٹ تینا اولی رنگ ءِ گوہانو۔
بلوچ چاگڑد ئٹ گیشتر مخلوق دائسکان سیاست ءِ پارلیمنٹ اسکان کننگ نا گمان تخک۔ نوآبادکار تینا مفاد آتیکن بلوچ چاگڑد ئٹ سیاست ءِ اقتدار، تاغت، اختیار و اُغدہ نا پن تسونے۔ ہر ہمو بندغ ہرا پارلیمنٹ ئٹ زنڈوک بلوچ نا لٹ و پل ءِ کرینے بلوچ نا زنک ایسری تون اوار اونا مڈی تے نیلام کننگ آ دژمن تون گٹ جوڑ کرینے، تو او دا کل گندئی تے سیاست نا پِن تسونے۔ اندن تاغت ور نا بیانیہ (Narrative) ءِ مون آ اتسہ سیاست نا پِن آ مون ءُ داغ تخانے۔
دا کل ہمو کالونیل چمبازیک ءُ ہرافک بلوچ چاگڑد آ چالاخی ئٹ اتنگانو تانکہ بلوچ باتی تا مِلی تیان مزاحمتی سیاست نا دروازہ غاک مدام بند کننگر۔ جہان ئٹ بلوچ ڈغار mineral land ئسے نا پِن ئٹ چاہنگک۔ اندن بلوچ چاگڑد ئٹ مخلوق نا mode of production اونا اندا راجی مڈی تیتو تفوک ءِ۔ اینو ہر بلوچ دا گِڑا غان سرپند ءِ کہ اونا مڈی تا بے پایان لٹ و پل مرسہ ءِ ولے ایلو نیمہ غان بلوچ چاگڑد ئٹ ہچو دنو سیاسی چاگڑد اس جوڑ اف کہ ہرانا بنیات آ مخلوق تینا راجی لٹ و پل ءِ ایسر کننگ نا جہد ئٹ مرے، انداکان گمان مریک کہ نوآبادکار بلوچ نا سیاسی اسٹرکچر ئٹ اخس بدلی ایسونے۔ نوآبادکار نا دا کل ہمو بے توار انگا چمبازیک ءِ ہرا مادی دروشم ئٹ بلوچ چاگڑد ئٹ چرخ کیرہ و بلوچ آتا نفسیات نا زی آ ہر وخت پریکٹس مرسہ ءُ۔
سیاست تون اوار ادب ہرا چاگڑد نا شونکار پاننگ مریک و چاگڑد نا شونداری ٹی ادب نا بھلو کڑد اس ہم ارے۔ چاگڑد نا ہرا super structure ءِ اونا تیوہ شونداری ادب تون تفوک ءِ۔ راج آتا دود، شناخت، دود و ربیدہ، دیہاڑ و ایلو مڈیک ہرافک ادب ئٹ بریرہ۔ دا کل چاگڑد نا ہمو مڈیک مریرہ ہرافتیٹی بدلی اتنگ آن بیدس نوآبادکار آک سرسہب مننگ کپسہ۔ اندن بلوچ چاگڑد ئٹ ہم کوزہ گیر تینا مفاد آتا بنیات آ دا کل راجی مڈی تیٹی بدلی ایسونے و ادب ءِ کاریم ئٹ اتسہ چاگڑد ئٹ تینا بے توار آ چمبازی تے تالان کرسہ ءِ۔ کوزہ گیر آک نزور آ راج آتا زی آ کوزہ کننگ آن گڈ کل آن مُست ہمو راجی چاگڑد آتیٹ نفسیاتی جنگ اس بناء کیرہ ہرانا تہٹی راج آک بھسکاری نا نیمہ غا انیسہ کارہ۔ نفسیاتی جنگ آن مراد اسہ اندنو ماحول اس ودی کننگ مریک کہ ہراٹی نزور آ راج آک احساس کمتری نا گواچی مرسہ تینا نرخ ءِ اُست آن دیرہ۔ ننتو دانا کل آن بھلا مثیل فرانس و الجزائر (French & Algeria war) نا ءِ۔ فرانسیسی سامراج آک الجزائری چاگڑد ئٹ رنگ ئنا بنیات آ نفسیاتی جنگ ءِ بناء کریر۔
الجزائری مخلوق کن ٹرم Negro ءِ اتسہ فرانسیسی سامراج چاگڑد ئٹ انداخہ الجزائری تے احساس کمتری نا گواچی کرے کہ مؤن رنگی آ مخلوق تینٹ تینے بندغ تصور کننگ کتوکہ۔ دا کُل نوآبادکار آتا psychological operations آک ءُ ہرافتے چاگڑد ئٹ ودی کیرہ۔ اندا چمبازیک مخلوق نا نفسیات ءِ بھلو کچ ئسے اسکان زہمی کیرہ۔ دا کل چم آتے کوزہ گیر ادب نا زریعت ئٹ چاگڑد ئٹی جہی کیک۔
اندن ہر ڈغار نا راستیک جتا مریرہ نن اگہ بلوچ چاگڑد ءِ ہُرن گڑا ننے اسہ بھلو کچ اسیٹی نفسیاتی جنگ اس خننگ ئٹ بریک۔ اینو بلوچ چاگڑد ئٹ علاقہ، قبائل و بولی تا بنیات آ دژمن ننے شیف خلنگ ءِ و نن بلوچ آتیٹ فرخ ودی کننگ ءِ۔ او مدام تینا کتاب آتیٹ ننے جاہل، وحشی پاریسہ ننے احساس کمتری نا گواچی کننگ نا کوشست کرینے ولے دا ڈغار آ دا راج ئنا مخلوق اونا کل چمبازی تیان واخب مرسہ اودے رد کرینے۔
جہان نا نقش آ اخس کہ چاگڑد تینا بنا آن الیس اینو اسکان زندہ سلوک ءُ گڑا او کل تینا ارتقائی سفر ئٹ سختی سوری و شیفی بڑزی خنانو۔ دیہاڑ ئٹ بھاز آ چاگڑد آک اندن مسونو ہرافک جہان نا تاغت ور آ چاگڑد آتا لڑ ئٹ مسونو ولے اینو ہموفک جہان نا نقش آن ٹکر مرسہ گوہنگسہ ایسر مسونو۔ ننتو دا ردئٹ کل آن بھلا مثیل مُغل آتا ءِ ہرافتا دا خطہ ئٹ بھلو تاغت ور ءُ حاکمیت اس مسونے ہرا نا رند آک دو سد سال مست اسکان ہم دیہاڑ ئنا پنہ آتیا اریر ولے اینو ہمو راج آک جہان ئٹ تالان ایلو تہذیب و تقافت آتیٹ اوار مرسہ تینا پجار ءِ گیرام کرینو۔ بلوچ چاگڑد ہرا اِرا سد سال آن زیات ءِ کہ غلامی نا زمزیر ئٹ تفوک مسونے ولے بلوچ آک دا دور ئٹ ہم تینا راجی پجار و تینا ڈغار ءِ گیرام کتنو۔ دا کل ہمو تربیت ءِ کہ ہرادے بلوچ آک تینا چاگڑد آن الکنو۔ اینو بلوچ آتا سوگوی کن اوفتا دیہاڑ تخوک ءِ، بلوچ آک تینا دیہاڑ ءِ مون آ تخسہ تینا راج ئنا شونداری ءِ کننگ کیرہ، ہراتم چاگڑد ئٹ شونداری بس گڑا دا راج زو اس تینا ڈغار و ڈیہہ نا خواجہی ءِ کننگ کرو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔