امریکی ریاست اوکلاہوما ٹی اسہ واری تون کورونا وائرس نا کیس آتیٹ ترندی بس و ہندی جانجوڑی چاہندار آتا پاننگ ءِ کہ صدر ٹرمپ منہ وخت مالو ہرا گچین کاری مچ گامی ءِ کریسس، گمانی اندا نا سوب آن دا ودکی مسونے۔
اسہ اندن ءُ وخت ئس ہراتم امریکا ٹی اولیکو وار اسہ دے آٹی کورونا وائرس نا ریکارڈ کیس آتا خبر تمانے، محکمہ جانجوڑی نا اسہ سینئر افسر ئسے نا پاننگ ءِ کہ دا ودکی نا سوب شار اٹی صدر ڈونلڈ ٹرمپ نا تدوکا تو ئنا گچین کاری مچ گامی داڑتون تفوک و ایلو پروگرام آک مننگ کیرہ ہراٹی ہزار آ بندغ آک اوار مسوسر۔
ٹرمپ تدوکا تُو ریاست اوکلاہوما نا شار ٹلسا ٹی اسہ بھلو گچین کاری مچ گامی ئس کریسس ہراٹی ماسک بیننگ آ پابندی متاوسس۔
ٹلسا شار ٹی محکمہ جانجوڑی نا اسہ سینئر افسر بروس ڈارٹ آن ہرا وخت صحافیک سوج کریر کہ دا وڑ ئنا بھلا مُچیک کورونا وائرس نا تالانی نا سوب مننگ کیرہ گڑا اونا پاننگ ئس “تدوکا گڑاس دے اٹی کم و ود پنچ سد کیس پک مسونے و ننے سما ءِ کہ اِرا ہفتہ مُست داڑے بھاز بھلو مُچی مجلس اس مسوسس۔ گڑا کنا خیال ءِ کہ نن بند آتے اوار کننگ کینا۔”
بروس ڈارٹ نا اشارہ دا ہیت ئنا کنڈا ئس کہ صدر ٹرمپ نا گچین کاری مچ گامی و داڑتون تفوک ایلو مجلس نا سوب آن کیس آتیٹ مننگ کروکا وڑئٹ اسہ وار تون ودکی مسونے۔
امریکی صدر ڈونلڈ ٹرمپ 20 جون آ ٹلسا ٹی ہڈتروکو آسہ بھلو گچین کاری مچ گامی ئسے آن تران کریسس۔ داٹی اونا ہزار آ ہمکوپہ غاک اوار مسونو ہراڑا ماسک بینگ المی متوسس۔ دا رد ئٹ جانجوڑی چاہندارک ترند ہیت ارفیسر۔ ٹلسا ٹی کورونا وائرس نا 4500 پک مروک کیس ارے اندن داڑان کہوکا تا کچ 72 ءِ۔
ایڑے امریکا ٹی تدوکا 24 سائت اٹی کورونا وائرس نا 59 ہزار آن ہم زیات کیس پاش مسونے و کوالخواہ تا پاننگ ءِ اسہ دے اٹی انفیکشن نا پک مروکا کیس آتا دنو بھلو کچ ئس امریکا ٹی اولیکو وار پاش مسونے۔ ریاست فلوریڈا ٹی کم و وَد 10 ہزار پوسکنو کیس پک مسونو اندن ٹیکسس ٹى نو ہزار آن خڑک و ریاست کیلفورنیا ٹی ہفت ہزار 800 پوسکنو کیس نا ودکی مسونے۔
امریکا ٹی کووڈ 19 آن ہردے ئی مرگ ئنا کچ ئٹ ہم جون نا اول آن اولیکو وار ودکی خننگانے و داسا ہردے ئی مرگ ئنا کچ کم و ود 900 ءِ۔ ملک ٹی زیمی تا جمعی کچ 30 لکھ آن ہم زیات مسونے اندن اسہ لکھ 30 ہزار آن زیات بندغ داسکان مرگ نا گواچی مسونو۔
انفیکشن نا داخس ترندی تون تالانی آن بیدس امریکی صدر دا ہیت آ ضد کروک ءِ کہ اسکول آک یلہ کننگر۔ چار شمبے نا دے او تڑی تسوسس کہ اگہ ہتم ئٹ ضلعی بست و بند نا خوانندہ ادارہ آتیٹ خوانندہ غاک اسیکہ وا کلاس تیٹ بتوس گڑا اوفک بنجائی کمک ءِ تورور۔