گدرینگوک آ 24 گھنٹہ ٹی 752 کیس مونا بسونو۔
نیشنل کمانڈ اینڈ آپریشن سینٹر نا پاننگ نا ردئٹ پاکستان ٹی اسے وار ولدا کرونا وائرس نا کیس آتیٹی گیشتری مننگے۔ ہرانا سوب آن گدرینگوک آ 24 گھنٹہ ٹی 752 کیس مونا بسونے۔ اندن 9 بندغ کرونا وائرس نا آماچ مرسٹ بیران مسونو۔ 514 بندغ دا دین آ جان جوڑ مسونو۔
یاتی مرے گدرینگوک آ دے تیٹی کرونا وائرس نا کیس آتیٹی گیشتری مننگ نا سوب آن تیوی جہان ٹی کرونا وائرس آن آماچ مروکا ملک آتیٹی پاکستان ہفدہمیکو نمبر ٹی بسونے۔
پاکستان ٹی دا وختسکان 3 لکھ 4 ہزار 386 بندغ دا ناجوڑی نا آماچ ءُ۔ کرونا وائرس آن بیران مروکا بندغ آتا کچ 6 ہزار 408 ء۔ 6 ہزار 295 ناجوڑ دا وختسکان ہسپتال، قرنطینہ سینٹر و اُراتیٹی آئسولیشن ٹی ءُ۔
یاتی مرے گدرینگوک آ دے جہانی جان جوڑی نا ادارہ (ڈبلیو ایچ او) اسے بیان اس شینک کرسٹ پارینے کہ اکتوبر و نومبر نا توہ ٹی دا گڑانا خلیس ارے کہ کرونا وائرس آن بندغ آتا بیران مننگ زیات مروئے۔
اندن پاکستان حکومت نا پارہ غان کرونا وائرس آن است جمی کرسٹ اولیکو وار لاک ڈاؤن ءِ ایسر کرے، مسے توہ آن پد سمارٹ لاک ام ایسر کرے۔ 15 ستمبر آن تیوی پاکستان ٹی خوانندہ جاہ آتے ام ملننگ نا موکل تننگا۔
ولے بھاز جاگہ غاتیٹی اسے وار ولدا کرونا وائرس نا ترندی ٹی تالان مننگ نا سوب آن مخلوق کن فریشانی ودی مننگے۔
اندن سندھ نا وزیر تعلیم سعید غنی احوالکار آتون ہیت و گپ کرسٹ پارے کہ دا وختا 88 اسکول آتا استاد آتیٹی کرونا وائرس پک مسونے۔
یاتی مرے سندھ ٹی 2 کالج نا استاد آتیٹی کرونا وائرس پک مننگ نا سوب آن ہمو کالج آتے ولدا بند کننگا۔
اندن بلوچستان نا بھلا شار کوئٹہ و ایلو علاقہ غاتا کئی اسکول نا استاد و چناتیٹی کرونا وائرس پک مسونے ہرانا سوب آن لیڈی سنڈیمن ہائی اسکول کوئٹہ، گرلز ہائی اسکول جناح ٹاون، گرلز ہائی اسکول کلی عالم خان، گرلز ہائی اسکول ژوب ءِ بند کننگانے۔
اندن سردار بہادر وومن یونیورسٹی نا پارہ غان ام کلاس آتے بند کننگانے۔