امریکی صدر ڈونلڈ ٹرمپ کورونا پازیٹیو مننگ آن گڈ تدوکا جمعہ آن ہسپتال ئٹ ئس۔ او وائٹ ہاوس آ اسیکہ وا بسونے واہم ڈاکٹر آتا پاننگے کہ او دائسکان سرجم دراخ متنے۔
امریکی صدر ڈونلڈ ٹرمپ ءِ والٹر ریڈ میڈیکل سینٹر ئٹ چار دے اسکان کووڈ نوزدہ کن ہلہلہ علاج آن گڈ دو شمبے نا دیگر آ رخصت تننگا۔
ماسک بینوک ٹرمپ ہسپتال نا بھلا درغ آن پیشن بس، اوڑے ساڑی حوالکار آتیا دوکے سرفے و میرین ون ہیلی کاپٹر ئٹ سوار مریسہ وائٹ ہاوس کن سر ہلک، ہراکان تدوکا جمعہ غا کووڈ نوزدہ پازیٹیو نا پاش مننگ و ناجوڑی آن گڈ ہسپتال آ دننگاسس۔ او پارے “تیوہ غاتا منتوار۔” واہم او حوالکار آتا ہچو سوج ئسے نا ورندی تتو۔
وائٹ ہاوس سرمننگ آ دمدستی تون او تینا ماسک ءِ کشیسہ جیب ئٹ تخا و عکس کشفے۔ دا نیامٹ وائٹ ہاوس نا کارندہ غاک اودے مبارکبادی تننگ کن بریسہ کریر۔
دوارہ صدر ٹرمپ نا اسہ ویڈیو اس شینک کننگا ہراٹی او وائٹ ہاوس نا بڑز تلہ غا سلوک ءِ ولے او ماسک بینوک اف۔ دا ویڈیو ئٹ ٹرمپ مخلوق ءِ کورونا وائرس آن بیم نا گواچی مفرنگ نا پنت تننگے۔
— Donald J. Trump (@realDonaldTrump) October 5, 2020
او کووڈ نوزدہ نا خطرہ ءِ کم اہمیت تریسہ پارے “دا (وائرس) ءِ تینے آ زوراک مننگ کہ ہلپبو۔ دادے تینا زند آ کوزہ کننگ کن ہلپبو۔ نمے بیم نا گواچی مروئی اف۔ نم دادے بے سہب کننگ کیرے۔ ای دا وائرس آن زیمی مننگ آن گڈ بھازا گڑاتے ہیل کرینٹ۔ ننتون جہان نا گچین آ درمان و ازباب آک اریر۔
ڈاکٹر آتا پاننگ ءِ کہ ٹرمپ کورونا وائرس نا زیم آتیان دائسکان پورو پیشن مننگ کتنے۔ صدر ٹرمپ وائٹ ہاوس ٹی مریسہ ناجوڑی نا علاج کرفنگ نا فیصلہ کرینے۔