کوئٹہ: ہسپتال تیٹ بے آسراتی تیا ڈاکٹر آتا برانز

بلوچستان نا ہسپتال آتیٹی ہچو بنماسی آسراتی اف – ینگ ڈاکٹرز ایسوسی ایشن

ینگ ڈاکٹرز ایسوسی ایشن بلوچستان نا پارہ غان سول ہسپتال کوئٹہ غان پریس کلب کن برازی مچی اس کننگا۔ کوئٹہ پریس کلب نا مون آ وائی ڈی اے نا ڈاکٹر حفیظ مندوخیل، ڈاکٹر رحیم بابر، ڈاکٹر اورنگزیب، ڈاکٹر یاسر خوستی و ایلوک ہیت و گپ کریسہ پاریر کہ بلوچستان حکومت سرکاری ہسپتال آتیٹی جان جوڑی نا غٹ آسراتی تے پورو کے اگہ متو وائی ڈی اے ہسپتال آتا بائیکاٹ کننگ نا فیصلہ کیک۔

مونی پاریر کہ سرکاری ہسپتال آتا حالیت دادے کہ سرنج ام اف۔ کرونا وائرس سرکار نا غٹ دعویٰ تے پاش کرے۔ اینو ہسپتال آتیٹی ٹیسٹ آک مفسہ انتیکہ ٹیسٹ کروکا غٹ مشین آک خراب ءُ۔ حکومت نا بے سہبی و رد انگا پالیسیک ننے بیوس کرینو کہ نن روڈ آتے پیش تمن۔

ڈاکٹر آک دا برانزی مچی ٹی تران کریسہ پاریر کہ مستکوئی آ ڈی جی ہیلتھ  ہفتاد کروڑ نا کرپشن ٹی اوار ءِ۔ ولے کرپٹ مننگ آن ابید اینو ام او بی ایم سی ہسپتال نا ایم ایس نا حیثیت ٹی کاریم کننگے۔ نن دا خواست کینہ کہ دا کرپشن نا پٹ و پول کننگ مرے اوڑتون اوار کرونا کن اخس فنڈ بسونے ہراڑے خرچ مسونو دافتا ام پٹ و پول کننگ مرے۔