کوئٹہ: ماجد و فیروز بلوچ نا بیگواہی نا برخلاف برانزی مچی

ماجد بلوچ و فیروز بلوچ نا خاہوت نا پارہ غان بلوچستان نا دارالحکومت کوئٹہ ئٹ پریس کلب نا مونا اسے برانزی مچی اس اڈ تننگا۔ دا مچی ٹی ماجد بلوچ و فیروز بلوچ تون اوار غٹ بلوچ بیگواہ تا یلہ کننگ نا بابت نعرہ خلنگا۔

برانزی مچی ٹی فیروز بلوچ، ماجد بلوچ، راشد حسین، ڈاکٹر دین محمد بلوچ، غلام فاروق نا خاہوت و وائس فار بلوچ مسنگ پرسنز نا چیئرمین نصراللہ و ایلوفک گپ و تران کریر۔

تران کریسہ پاریر کہ بلوچستان ٹی بیگواہی داخس زیات مسونے کہ اینو اسے ام دنو اُرا اس اف کہ اونا باتیس بیگواہ متنے۔ ہر خاہوت اینو بیگواہی نا ظلم و بیدادی آن گدرینگسہ ءِ۔

مونی پاریر کہ ریاست پاکستان ٹی اندن ایلو راج نا باتی تے عدالت ٹی ہتنگک یا بندی خانہ ٹی بندی کیرہ اوفتا خاہوت آتے موکل ارے کہ او تینا بیگواہ غا بندغ آتون اوڑدہی کیر ولے بلوچ راج نا باتی تے دا گڑانا موکل اف کہ او تینا بیگواہ غا بندغ آتون اوڑدہی کیر۔ اینو زوراکی نا بیگواہی نا سوب آن ریاست نا جند ئنا ام بدنامی مننگے نن دا ریاست آن خواست کینہ او بیگواہ غا بلوچ آتے یلہ کے تاکہ او دا بدنامی آن بچے۔

یاتی مرے فیروز بلوچ آئی ٹی یونیورسٹی آن انجیئرنگ کریسس، بلوچستان یونیورسٹی آن بلوچی ٹی ایم اے کننگ ئس۔ فیروز بلوچ ءِ 29 مئی 2019 آ سفر نا وختا اونا الہ مار جمیل بلوچ تون اوار قلات نا علاقہ غان بیگواہ کننگا اندن شش توہ آن پد اونا الہ مار جمیل بلوچ یلہ کننگا ولے فیروز بلوچ دائسکان بیگواہ ءِ۔

ماجد بلوچ بلوچستان یونیورسٹی ٹی کمپیوٹر سائنس نا خوانندہ اس ءِ۔ ماجد بلوچ ءِ 31 مئی 2019 آ اونا جند ئنا علاقہ قلات ٹی اونا اراغان بیگواہ کننگا ہرا دائسکان بیگواہ ءِ۔