بلوچ لُمہ سینا چھٹی، تینا لغورا مار اکن – ساحل بلوچ | حیراف بلوچ

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

بلوچ لُمہ سینا چھٹی، تینا لغورا مار اکن

نوشت: ساحل بلوچ | مٹ: حیراف بلوچ

دی بلوچستان پوسٹ

کنا مار نے یاتے کہ فوجیک ننا خلق آ بسر و ماما حیبتان نا اُرا غا شولنگار، پیر انگا ماما حیبتان ءِ بے شرف کریر، کُٹار و کٹّنگ آن پد تینتو اوار دریر۔ ہمے دے آن پد نا سنگتاک مرید، تبک، بشام، زہیر و سالِم ہم خلق آن پیشتمّار۔ خلق آن پیشتمنگ و گُم مننگ آن پد اوفتا اینو دے اسکان ہچ حوال متنے۔

نے ہوش کیک اوفتا ہننگ آن اِرا سال پد سیڷ انا دیک اسر ای اُراٹی تولوک ئسوٹ کہ نی بسوس و کنا رہی آ توسُس و پاریس؛

لمہ جان! لمہ جان ای خواوه کہ تینا سنگتاتے کن کاؤ، اوفتا ہمرہی کیو، راجی آجوئی نا جنگ ئٹ اوار مریو، نا ننگ ءُ ناموس ءِ بد آن رکھنگ کن ساڑی مریو و تینا بیوس آ راج ءِ ہم مِزل اسکان سر کیو۔

کنا مار ! اگہ نے یاد مرے، ای نا دوتے بُک ہلکٹ نا کاٹُم ءِ تینا زان تیا تخاٹ و پاریٹ کہ کنا چُنا کنے ناز مرو ءِ نے آ، کنا خنک کنا کاٹم بُڑز مرور اگہ نی دُنو کسر اس دیس، ولے کنا مار یات تخس کہ دا کسر آ ہننگ دُن اڑزان اف، خدانخواستہ  دُن مف کہ پگہ نا دے لغور مروس و تینا پیر انگا باوه نا خنتے شیف کروس، اونا پِن آ لپ تخوس۔

ولے کنا مار اگہ نی دا کل ءِ سختی سوری تے سگنگ کن تیار اُس گڑا مونی مر ای نا کسر ٹی سلپروٹ بلکن نا شاتگامی کن نیک دُوائی کروٹ، پاک آ خدا نے سوبمندی نشان ایتے۔

کنا چُنا! نا ہننگ آن گُڈ ننا مُچ آ اُرا تامور ءُ مونجا مس۔ ہر گڑا نا کمی و مُری نا ڈس ءِ تسوکہ ولے ای تینا اُست آ خل اس تخاٹ، نا ایلُم ءِ سگ انا پنت تسوٹ کہ کنا مار تینا ڈیہہ آ ندر مننگ کن پیشتمانے، ننا ننگ و ناموس ءِ رکھنگ کن ساڑی ءِ۔

کنا چُنا! نا ہننگ آن سال اس گُڈ اسے وار پدا فوجیک ننا خلق آ جلہو کریر و ننا اُراغا شولنگار، نا دُر انگا ایلُم ءِ تینتو اوار دریر ولے ای پنتویٹ، چَک خلتوٹ، اُست کنا کپ مسوکہ ولے نے پریشان کتویٹ، نے تسلی تننگ کن مدام ساڑی ئسوٹ، انتیکہ نا دا پاک آ کسر کنکن کنا حوصلہ ئس۔ کنا مار نے یات تو مرو ءِ کہ ای نے پاریٹ، نی ننا چُڑتے خلپیس، بس تینا ہپام ءِ جنگ و دا جُہد نا سوبمندی تون تخس اونا دیمروی و مون مُستی دننگ کن فکر کیس۔

کنا مار! نا ایلم ءِ دننگ آن پد فوجیک خوائسر کہ نی بر نن نا ایلم ءِ اِلینہ ولے ای نے اڑساٹ نے بننگ نا پاتویٹ بلکن نے حوصلہ تسوٹ، نا اُست ہم خل انبار سخت ئس اندا خاطران ظالم آ لشکر نا ایلم نا جون ءِ مرگاپ آ بٹے ہراڑے کہ دائسکہ لالا منیر، شیر محمد و غلام محمد نا دترک تفین ءُ۔

کنا مار! اگہ نی گیرام کتنوس تو یات کر ہمے دے ءِ کہ نی تینا ایلم نا شہادت آ بسوس کنے سگ انا پنت تسوس و پاریس کنا لمہ جان، پریشان مفہ، پریشان مفہ کہ دا آجوئی نا جنگ ءِ دا حوصلہ تا جنگ ءِ، دا جنگ ئٹ دُنو سخت ءُ وخت بریک ولے کنے جوان یات ءِ کہ ای تو اُست ءِ بِٹتویسٹ، نا ایلم نا شہادت کنا سینہ ءِ سیائیجی نا پاناد انبار پراخ، چلتن آنبار بُڑز و بولان آنبار پین زیات مہکم کریسس۔

کنا مار! نا جنگی و توکل نا جوزه غان زوراکا لشکر نا ہوش ہم پرینگاسُس اندا خاطران منہ دے آن پد ظالم آ فوجیک اسے وار پدا ننا خلق آ اوار تمار ننا اُرا اوفتا ناپاک آ بوٹ تے آن اسے وار پدا پلیت مس۔ زوراکا لشکر نا باوه ءِ سُم تا گواچی کرے، نے چوری و کنے جنوزان کریر۔

کنا مار! کنکے جہان ٹی ہچس سلتو، نہ مار نہ اُرا نہ اَرغ، کنکے جہان ٹی بس نی سلیسُس ولے نے ای تینا وطن کن ندر مننگ آ رائی کریسُٹ۔

کنا مار! نے سما ءِ کنکے جہان ٹی بس نا پن ئس ولے ای تینا اُست ئٹ ہمے شیرزال آ نیاڑی ئسوٹ کنا اُست کنا جوزه دائسکہ سلامت اسر، وخت انا زوراک کنے بے چُنا، بے اَرغ و بے اُرا تو کرے ای وختس دا سیال انا اُراٹی تو وختس اے نا، پیشیم اس دا ہمسایہ تون تو ننکان ایلو نا اُراٹی، ولے کنا ارادہ غاک شاشان ئسر تو حوصلاغاک مہاران۔

ولے کنا مار! درو مہاران پنّا، درو بولان اوغا، درو سیائجی پِٹا، نا ایلم و باو نا شہادت کنے اوغیفتویر ولے نا لغوری اوغیفے۔ ای بنگٹ کہ نی تینا کوپہ نا توفک ءِ لغورا دشمن نا مونا بٹینس، ای بنگٹ کہ نی تینا لمئی آ ڈغار تون وفا کتویس و تینا باوه نا پن آ داغس تخانس، ای بنگٹ کہ نی تینا ایلم نا بیرے تینا دشمن آ ہلانُس۔0

گڑا کنا مار! کنا ارینگوکا پُچاتا، کنا بے اُرائی و کنا جنوزانی نا بلا زمہ وار نی اُس۔ خن شیف، اگہ نے لغوری نا پِن تینکے خوش مسوکہ اگہ نے دا پن تینکن دوست مسوکہ گڑا کنا اَرغ ءِ انتئے کنے آن پُلاس کنا چُنائے انتئے شہید کرفیس، کنا اُرا نا بلہ تے انتئے ارفیس و کنے آ جنوزانی نا پِن ءِ انتئے الاس؟

اگہ نے لغور مروئی ئس گڑا وختی مروسُس کنا اُرا ءِ انتئے اُشاس، نی تینا اسٹ آ ساه نا بچیفنگ کن لغور مسُوس حمیدُک، انتئس سلیس نیکن و ہلاس کنکن لغور؟ ولے نی کنا مار افیس نئے ای نا لمہ اُٹ، ای شہید ولی محمد نا اُرائی و شہید اُزیر جان نا لمہ اُٹ نی کنا مار متویس۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

بلوچستان: سم کاری نا جتا تدینی تیٹی اسہ بندغ ئس بیرا، اسٹ ٹپی

بلوچستان نا علاقہ بولان و کوئٹہ ٹی سُم کاری نا ویل آتیٹ اسہ بندغ اس بیران و اسٹ ٹپی...

گودی – شاعر: انور بلسم

"گودی" مَشتیٹی ئے گدان گودی نا میڷ تتو نے شوان گودینا راج اونا اوڑ تون زیب دار قصّہ ئے دا بیان گودی نا غلہ غاتے پِڑا شُپِک او کھونٹ سے...

میر گل خان نصیر – شاہ محمد مری | عتیق آسکوہ

بلوچستان نا ادب و سیاست ئٹ بڑز پن تخوک میر گل خان نصیر نا زند آ تالان کتاب "میر گل خان ںصیر" شینک مس۔ دا...

راھشون ادبی دیوان جنرل باڈی مجلس و بنجائی گچین کاریک

شال ئٹ راھشون ادبی دیوان بلوچستان نا سالانہ جنرل باڈی مجلس و گچین کاریک، آصف بلوچ مرکزی چئیرمین، اسرار شوہاز بلوچ سینئر وائس چیرمین...

تیوی پاکستان ٹی خوانندہ جاہ تے بند کننگ نا پڑو

بنجائی وزیر تعلیم شفقت محمود نا کماشی ٹی بین الصوبائی وزرا کانفرنس اڈ الک ہراٹی غٹ صوبہ غاتا وزیر تعلیم آک بشخ ہلکر۔ تیوی...