بلوچستان نا درالحکومت کوئٹہ ٹی وائس فار بلوچ مسنگ پرسنز نا برانز ءِ 4128 دے پورو مس، سوراب آن سیاسی و چاگردی کارگشاد مجید بلوچ، محمد اسلم بلوچ، دستگیر و ایلوفک کیمپ آ بسر و بیگواہ بندغ تا خاہوت آتیتون اُست ہسونی نا درشانی کریر۔
دا وخت آ وی بی ایم پی نا راہشون ماما قدیر بلوچ نا پاننگ ئس کہ زئی تیٹ بشخ کریسہ بلوچ آتا وجود ء ایسر کننگ کن اسہ مرک ہند اسیٹ بدلی کننگانے، تدوکا بھاز آ سال تیان بلوچستان نا شار آتیٹ گاڑی تا توار کم و توفک آتا زمبارہ تہو ء کوزہ ٹی ہلکنے۔
او پارینے پاکستانی لشکر تینا رٹ ءِ ٹہفنگ نا پن آ بارود نا ڈیر تینا گماشتہ غاتا دوٹی تس، ہرا تینا آقا نا حکم آ بلوچستان ءِ قتل و کوش نا پٹ ئٹ بدل کریسہ تینا مخست ءِ ہلکر۔
ماما قدیر پاریے تدوکا 12 سال آن بلوچستان ٹی بیگواہ بندغ آتا خاہوت آک پرامن جدوجہد نا سوب آن فورسز نا بے دادی نا گواچی ءُ، اندن زیمی آ خاہوت آک کراچی تون اوار جتا علاقہ آتیٹ باہوٹ ہلکنو تاکن تینا زند ئنا بچوکا دے تے جارات ئٹ گُدریفنگ کن ولے غلام راج ئنا بخت ئٹی جارات و خوشحالی ہرادے، بلوچ اسکان غلام ءِ پاکستان نا بے دادی تا گواچی مریسہ کرو۔
ایلو پارہ غان وائس فار بلوچ مسنگ پرسنز نا راہشون نصراللہ بلوچ پارینے کہ بیگواہ کننگوک شش بندغ نا نوشت احوال ءِ حکومت ءِ تننگانے۔
او پارے کہ دا نوشت احوال ئٹ چار خوانندہ ورنا تون اوار اِرا پین بندغ نا بیگواہی نا شابیتی ئٹ احوال نوشتہ کروک ءِ۔ اوفتیٹ پنجگور آن تعلقدار دوست محمد نا مار ثناء اللہ، خاران آن تعلقدار محمد اسحاق نا مار ثناء اللہ، قلات آن تعلقدار ماجد بلوچ، پنجگور آن تعلقدار فیروز بلوچ، نوشکے آن تعلقدار لیویز کارندہ عبدالغنی مینگل و مستونگ آن تعلقدار عبدالرحمٰن نیچاری اوار ءُ۔
تنظیم نا پارہ غا پن کروک بندغ تے یلہ کریفنگ نا خواست کننگانے۔