بلوچستان ئٹ بیست چار گھنٹہ اٹ روڈ شکست آتیٹ مسہ بندغ بیران، اندن 17 بندغ ٹپی مسونو ویل آک بیلہ، منگچر، کھڈکوچہ و دالبندین اٹ مسر۔
بیلہ آر سی ڈی روڈ آن خڑک ویلپٹ نا ہند آ کراچی آن کوئٹہ ہنوکا مسافر کوچ و ٹرالر ڈک لگار ہراڑان اسہ بندغ اس مرگ نا گواچی مس اندن 10 بندغ ٹپی مسونو۔ حوال تا رد ئٹ ٹپی آک بیلہ سول ہسپتال سرکننگار۔
اندن منگچر ٹى روڈ شکست اس مس، گاڑی و مسافرکوچ سورو نا ہند آ ڈک لگینگ نا سوب آن اسہ بندغ اس بیران مس و چار بندغ ٹپی مسونو۔
گیشتر حوال تا رد ئٹ کوئٹہ آن کراچی آ ہنوکا گاڑی و مسافر کوچ نا ڈک لگینگ نا سوب آن محلہ جام یوسف کالونی لسبیلہ آن تعلقدار محمد وارث نا مار منیر احمد ہند آ بیران مسونے ۔
اندن ٹی ٹی سی کالج حب لسبیلہ آن تعلقدار گلاب دین نا مار عبداللہ، حب چوکی آن تعلقدار بالاچ نا مار داود، ڈیرہ مراد جمالی آن تعلقدار رحیم بخش نا مار بالاچ، و مستونگ آن تعلقدار جمعہ خان نا مار جہانزیب ٹپی مسونو۔ ریسکیو 1122 نا کارندہ آک ہند آ سرمسر زیمی تے خڑک ئنا ہسپتال آ سر کریر ہراڑے آر ایچ سی ٹی دوا درمان مننگ آن گُڈ کوئٹہ آ رادہ کننگانو اندن جون المی کاروائی آن گُڈ خاہوت نا دو ٹی تننگانے و کوچ ڈرائیور ہند آن نرانے۔
پین سر و سوج ہندی بند و بندی خوالخواک کننگو۔
مُستی حوال تا رد ئٹ دالبندین پاک ایران بھلا روڈ آ گیس پلانٹ نا خڑک گاڑی و پک اپ ڈک لگانو ہراڑان اسہ بندغ اس مرگ نا گواچی مس و اسٹ ٹپی مسونے، بیران مروکا و ٹپی اسپتال سرکننگانو۔
اندن پین حوال ئسے نا ردئٹ کھڈکوچہ ٹی روڈ شکست آن اِرا بندغ بیران مسونو۔
بھلا روڈ آ کھڈ کوچہ نا ہند آ ترند بننگ آن موٹر سائیکل ٹریلر گاڈی ڈک لگار ہرانا سوب آن موٹر سائیکل آ سوار اِرا بندغ ٹپی مسونو، ہرافتیٹ اسٹ بد حالیت ئٹ ءِ، ویل آن گُڈ ٹپی آک دمدستی وڑ ئٹ الحسن ہوٹل آ ٹہیفنگوک ڈاکٹر اسماعیل بلوچ ایمرجنسی اینڈ کلینک سینٹر آ سر کننگار، ہراڑے ڈاکٹر اسماعیل بلوچ ٹپی تے مفت دوا درمان کرے۔