بلوچستان نا علاقہ مچھ ئٹ کول کمپنی مارگٹ نا اسہ کوئلہ کانڑ ایسٹی کاریم کننگ نا نیام زہریلا گیس نا پر مننگ نا سوب آن مسہ کان کن بے سما، زیمی آ کان کن آک ایلو کان کن تا کمک ئٹ مچھ ہسپتال آ دننگار ہراڑے بنائی دوا درمان آن گڈ پین دوا درمان کن کوئٹہ غا مون تننگار۔
ہژدہ دے مست ہم اندا کان ئٹ گیس تراک آن ارا کانکن بیران و 9 کانکن ساہ بند مننگ آن بے سما مسوسر۔ دو شنبہ نا دے آ عالیانی کول کمپنی مچھ نا اسہ کوئلہ کانڑ اسیٹی کاریم کننگ نا وختا، گیس نا پر مننگ نا سوب آن مسہ کانکن بے سما مر، بے سما مروکا کانکن آتیٹ حسین علی نا مار سہراب، حسین علی نا مار عصمت و عید محمد نا مار علی محمد اوار ءُ،
زیمی آ کان کن آتا حالیت خلیس نا ہد اسکان ءِ، تعلقداری تا ہزارہ ٹاون کوئٹہ آن پاننگک۔
یاتی مرے مرے کہ اندا توہ نا 3 دسمبر 2020 آ زاری آ گیس نا پر مننگ نا سوب آن تراک مس ہرانا سوب آن ارٹ بیران و نہہ ٹپی مسوسر، خنوک شاہد آ کان کن پن ءِ ڈھکنگ نا شرط آ پارے کہ جوان کاریم نا مفرنگ نا سوب آن کوئلہ کانڑ آتیٹی ویل آتا مننگ ہڑدے نا گڑاس مسونے، منیجر تا کاریم ہڑدے کولا کانڑ آتے ایشکامی ئٹ اُرنگ ءِ ولے منیجر آک تینا زمہ واری تے پورہ کپسہ، بیدس ارنگ آن کوئلہ کانڑ آتیٹی کاریم بناء مریک ہرانا سوب آن ویل آک مریرہ۔
اونا پاننگ ئس کہ ویل آتا حالیت ئٹ کانکن آک تینٹ کمک و ریسکیو نا کاریم ءِ ایسری تیرہ۔ دا وخت بیدس تربیت یافتہ آ کان کن آ ریسکیو نا وخت آ تینٹ ویل آتا گواچی مریرہ، ریسکیو سینٹر بیرہ کاغذی کاروائی اسکان سلوک ءِ، مائینز انسپکٹر مچھ ءِ ہر توہ مائنز ایکٹ نا رد ئٹ دہ انسپکشن المی ءِ ولے بے بختی آن مائنز انسپکٹر تینا ادارہ ٹی ساڑی مفک گڑا دوننگا حالیت ئٹ ویل آک مننگ کیرہ،
او پارے کہ بھازا کوئلہ کانڑ تیٹ تئو نا بست و بند اف، متکنا وڑ تیٹ کانڑ پٹنگ نا ویل تا سوب جوڑ مسونے، داڑان بیدس ویل آتا وختا ایمبولنس و جانجوڑی آسراتی مفرنگ نا سوب زیمی کانکن آک تینا زند آن دو سلیرہ۔