سیکیورٹی کوالخوا تا پاننگ ءِ کہ نادرست سلاء بند بندغ آک کابل ئٹی اسہ جہلو اسیٹی اِرا نیاڑی جج آتے سم کاری کریسہ کسفیر و اسٹ ءِ ٹپی کرینو۔
پولیس ترجمان فردوس فرامرز اسہ بیان اسیٹ پارے کہ ویل یک شمبے نا سہب 8:30 سائت نا خڑک کابل نا قلعہ فتح اللہ نا علاقہ ٹی مسونے۔
ترجمان پارے کہ نادرست سلاء بند بندغ آک نیاڑی جج آتیا آ سم کاری کریر ہراڑان اِرا جج مرگ نا گوچی مسر و اسٹ ٹی مس، او ویل ئنا رد ئٹ پین گیشتر حوال تتئو۔
افغان نیشنل ریڈیو و ٹیلی ویژن حوال تسونو کہ دا ویل ئٹی ارا نیاڑی جج بیران مسونو و ایلو ٹپی مسونو ولے ایلو افغان میڈیا تا رد ئٹ جہلو ٹی بیران مروکا اسہ نیاڑی جج اس ئسک و ایلوفک وزارت انصاف نا ملازم ئسر۔
میڈیا پارے کہ سم کاری اسہ گاڑی ئسے آ مسونے و ٹپی مروکا ارا بندغ تون ڈرائیور ہم اوار ءِ۔
افغانستان نا تہٹی زوت مروک جہلو و بمب تراک آتیٹ بھازا بندغ آک کسکنو، اندن طالبان و افغان حکومت نا وفد قطر ئٹ جہانی راجی مذاکرات کن تولوک ءِ۔
افغانستان ٹی سرکاری اوغہدیدار، سکیورٹی فورسز و اہم تنصیبات آتیا زوت مروکا بھاز آ جہلو آتا تہمت طالبان و داعش آ خلینگانے۔
پن کروک جہلو تا ذمہ واری ءِ دائسکان اسہ ٹولی اس ہم ارفتنے۔