نوشکے: لمئی بولی تا جہانی دے نا ردئٹ سیمینار

زند اکیڈمی نوشکے و نوشکے پریس کلب نا پارہ غان پریس کلب ٹی لمئی بولی تا جہانی دے نا ردئٹ اسہ سیمینار اس اڈ تننگا۔ دا سیمینار ٹی زند اکیڈمی نا کماش یار جان بادینی، شبیر رخشانی، نوشکے پریس کلب نا کماش حاجی طیب یلانزئی، صحافی سعید بلوچ، لطیف الملک بادینی، غمخوار حیات، ڈاکٹر عالم عجیب، وحید عامر بلوچ و ایلوفک تینا خیال آتا درشانی کریر۔

سیمینار ٹی ہیت و گپ کریسہ پاریر کہ ہر اسے راج اسیکن خیال نا درشانی کن غٹ آن جواننگا بولی اونا لمئی بولی ءِ، ہرا چاگرد ٹی زانت کار آک تینا ڈیہہ تون ہمگرنچ مسر گڑا اوفتا تعلقداری تینا ڈیہہ تون سوگوْ مریک۔ ہمو ملک آتا اُلس تینا دود و ربیدہ، تینا بولی تینا تاریخ آ فخر کیک۔
او مونی پاریر کہ لمئی بولی ٹی خواننگ ہر چنا نا بنماسی و خوْندی آ حق ءِ بلکن دا ہیت ام پاش ءِ کہ جہان ٹی دیمروری کروک انگا راج آک لمئی بولی ٹی خواننگ نا سوب آن دیمروی کرینو۔

سیمینار نا گڈ سر ٹی قرار داد مونا ہتنگا کہ بلوچی و براہوئی بولی ٹی خواننگ ءِ المی کننگ مرے۔ سبی آن ہلیس مہرگڑھ اسکان روڈ جوڑ کننگ مرے و مہر گڑھ ٹی میوزیم اس ام جوڑ کننگ مرے۔ بلوچی و براہوئی اخبار، رسالہ و چینلز آتے اشتہار تننگ مرے۔ بی بی سی، وائس آف امریکہ چینل آتیٹی بلوچی و براہوئی بولی ٹی پروگرام بندات کننگ مرے۔