بلوچستان نا ضلع سبی ٹی اسہ بمب تراک ئسے نا سوب آن پنج مزور کار مرگ نا گواچی و پاکستانی فوج نا کارندہ آتون اوار پنج بندغ ٹپی مسونو۔
ڈپٹی کمشنر سبی زاہد شاہ نا پاننگ ءِ تراک سبی آن 30 کلومیٹر مُر بابر کچ نا علاقہ تندوری ٹی ہمو وخت مس ہرا وخت مزور کار آتیکن ہنوک آ گاڑی کچہ غا روڈ ئنا ماس آ ڈھکوک دیسی آ بمب ءِ لخت تس۔
مزور کار آک پاکستانی فورسز فرنٹیئر کور نا سکیورٹی ٹی دیر ئنا پائپ لین ءِ شاغنگ کن ہننگ ئسر۔
سبی نا ڈپٹی کمشنر پارے کہ تراک آن گاڑی بھس مسونے و اوٹی سوار پنج مزور ہند آ ساہ تسر۔
مسہ مزور و اوفتا رکھ اکن اوار ہنوک آ ارا ایف سی کارندہ ہم تراک ٹی ٹپی مسونو، ٹپی آک سی ایم ایچ سبی آ رادہ کننگار۔
ڈپٹی کمشنر نا رد ئٹ کہوک آ مزور کار آتیٹ چار ئنا چائنداری حیدر علی، عثمان یوسف، محمد بشیر و مظہر حسین نا پن ئٹ مسونو، چار انگاتا تعلقداری پنجاب آن ئس۔
سبی و ہرنائی نا نیام ئٹی ساڑی دا مشی آ علاقہ ٹی داڑان مست ہم دا وڑ ئنا جہلو مسونے۔
داڑے فورسز آ مروکا جہلو آتیٹ بلوچ سلاء بند آجوئی دوست تنظیم بی ایل اے اوار مسونے، دائسکان جہلو نا ذمہ واری اسہ تنظیم اس ہم ارفتنے۔