اختر مینگل انت کننگ ءِ
نوشت: مہر مار
دی بلوچستان پوسٹ
نن اینو دے اسکان دا گڑا ءِ پو متون اختر مینگل انت کننگ ءِ؟ او بلوچ راج ئنا ڈکھ ءِ تخنگ ءِ یا بلوچ راج اکن ڈکھ تخوکا ورنا تے سامراج تون اوار سم تا گواچی کننگ ءِ۔ دا سوج ئسے کہ اختر مینگل جاگہ اس بلوچ راجی تحریک آتا مُخ تفی ءِ کرینے تو جاگہ ئسے آ بلوچ راج ئنا دژمن نا خلاف مروکا جلہو تا مذمت ہم کرینے، جاگہ ئسے آ مڈی تا لُٹ پل نا خلاف ہیت کیک تو جاگہ ئسے آ تینٹ وڈھ ئنا خل تے سودا کیک۔ اندن جاگہ سے آ دتر کُنوکا فوج ئنا خلاف ہیت کیک تو جاگہ ئسے آ تینا ووٹ ئٹ اونا حمایت ءِ ہم کیک۔
ہٹلر ہرا کہ لکھ آ بندغ آتے مرگ ئنا گواچی کرے ہرا نا پن جہان نا بھلا ظالم آتیٹی بریک ۔ہٹلر اسے وخت اس اسہ آزموندہ اس کریسہ اسے چُک اس ہلیک و چُک ئنا غُٹ آ بدن نا پُٹ آتے کشکِک ہرا نا سوب آن چُک لوشت مریک او چُک ءِ بینگن ہلک پدا چُک ءِ یلہ کیک غلہ چَٹِک ای آتے۔ چُک تینا بینگنی ءِ مر کنننگ کن ہٹلر نا پارہ غا غلہ کُننگ کن دودینگک۔
ای ہم اندا سرپد مریوہ اختر اندا چُک ئنا وڑو راہشون ئسے۔ اول تو ای اختر مینگل ءِ راہشون اس سرپد مفرہ انتئے کہ کنا مونا راہشون ہمو بندغ ءِ ہرا تینا کروکا وعدہ غاتا سلیک داڑسکان کہ او زندان تے ہم قبول کیک ولے تینا تخوکا قدم ءِ پدی ہرفپک اسل اندا وڑ اختر مینگل ہر مُد ہر بازار نا مزہ ءِ ہلنگ ءِ دوست تخک۔
اینو آن ہفت سال مُست حاصل خان بزنجو و ڈاکٹر مالک نا خلاف چڑہ اندا دوبہ ءِ خلککہ کہ ڈاکٹر مالک توتک نا ورنا تے خلفینے او مچا بلوچستان ئٹ ورنا تے بیگواہ کریفنگے اوتے خلفنگے، ریاست نا جوڑ مروکا ڈیتھ اسکواڈ نا راہشونی ءِ کننگ ءِ۔
شعور تخوکا لس مخلوق دا گڑا تیان پو ءِ کہ ڈاکٹر مالک تینا دور آن ہلیس اینو دے اسکان بلوچ راج ئٹ پنجابی سامراج کن بھاز بھلو کمک ئسے او دا گڑا تیان ہم جوان وڑٹ پو ءُ کہ اندا مچا راج ئٹ ورنا تے سُم تا گواچی کریفے، لس مخلوق نا اُرا تیٹی آپریشن کریفے لس مخلوق ءِ بیگواہ کریفے۔ مچا بلوچستان ئٹ زندان جوڑ کرے ۔چیئرمین زاہد کون انگا راہشون آ تے اینو دے اسکان بیگواہ کریفے یا سُم تا گواچی کرے۔
اگہ اختر مینگل لیڈر ئسے تو امر؟ کنا تو ملی ٹی ہچ اس تولنگ اف انتئے کہ وخت اس دتر کُنوکا نا برخلاف ہیت کیک وختس تینا تا دتر تے کُنیک۔
برجاء ءِ۔۔۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔