بلوچستان نا علاقہ کوئٹہ، تمبو و نوکنڈی ٹی مروک ویل آتیٹ 2 بندغ مرگ نا گواچی مسونو اندن 16 ٹپی مسونو۔
حوال تا رد ئٹ تمبو نا علاقہ ٹی غیرت نا پن آ باوہ تفر ئٹ جہلو کریسہ تینا مسڑ ء کسفے و اسہ بندغ ئسے ٹپی کرے۔
پولیس نا پاننگ ء تحصیل تمبو نا پولیس تھانہ خان کوٹ نا علاقہ گوٹھ محمد امین ٹی ڈوہدار صابر غیرت نا پن آ تفر ئٹ جہلو کریسہ تینا مسڑ مسمات افروز بی بی ء کسفے و محمد اکبر ء ٹپی کریسہ نرا۔
حوال رسینگ تون خان کوٹ پولیس ویل ئنا ہند آ سر مس جون و ٹپی ء دو ٹی ہلینگ آن گڈ ہسپتال آ راداہ کرے ہراڑے المی کاروائی آن گڈ جون خاہوت نا دوٹی تننگا، پین کاروائی خان کوٹ پولیس بناء کرینے۔
اندن بلوچستان نا دارالحکومت کوئٹہ نا علاقہ ڈبل روڈ آ سلاء بند بندغ آتا سم کاری آن مسہ بندغ ٹپی مسونو۔
گیشتر حوال تا رد ئٹ کوئٹہ نا علاقہ ڈبل روڈ آ زرغون مارکیٹ نا خڑک سلاء بند بندغ آک سم کاری کریسہ مسہ بندغ ء ٹپ کریر ہرا دمدستی وڑ ئٹ ہسپتال آ سر کننگار۔ پین کارروائی تعلقدار بند و بست کننگ ء۔
اندن پین حوال ئسے نا رد ئٹ نوکنڈی ٹی ارا گاڑی نا ڈک لگینگ آن اسہ بندغ اس مرگ نا گواچی، و بھاز آک ٹپی مسونو۔
نوکنڈی نا علاقہ کوہ دلیل نا ہند آ اینو سہب ئنا 10 بجہ آ ارا ویگو گاڑی نا ڈک لگینگ نا سوب آن محمد امین پنی ء بندغ اس ہند آ مرگ نا گواچی مسونے، اندن 13 بندغ بھاز ٹپی مسونو۔
ٹپی آتیٹ میر شہزاد اہجباڈی تون اوار نیاڑی و چنا ہم اوار ء، میر شہزاد اہجباڈی نا گاڑی تفتان آ ہننگ ئس اندن ایلو پارہ آن بروکا گاڑی سردار زادہ افتخار محمدزئی نا ئس ہرا تفتان آن نوکنڈی آ بننگ اس۔
ویل تروند بننگ و ریک نا تئو ئنا سوب آن مس، ٹپی آک نوکنڈی نا ایف سی ہسپتال ٹی دوا درمان مننگ آن گڈ دالبندین آ رادہ کننگانو۔