شیرا وتن نا شیر – مہر مار

شیرا وتن نا شیر

نوشت: مہر مار

دی بلوچستان پوسٹ

شہید صمد عرف شیرا کوزہ مروکا لمہ وتن بلوچستان نا بارن انگا ڈغار و مڑدنگا جنگجو بابو نوروز نا ہنکین ٸٹ خن ملا ہرا وخت شیرا دا خاک آ خن ملا اولی دے آ اونا خنک خوارشت کُنگُرا اودے اولی دے آن دا سما ٸس کے ای کوزہ مروکو ءُ راج ٸسے ٹی ودی مسونُٹ کوزہ مروکا راج آتے ٹی زند گدریفنگ بے مان ءِ، او تینا اولی دے آن دا فیصلہ ءِ کریسک کے ننا ایسری مزِل آجوٸی یا تو شہدت ءِ اندا سوب ءِ کہ مجید، اژو، دلجان، شیرا ایلو سنگت آک دا فیصلہ کریر کے ننے راج ٸکے ندر مروٸی ءِ۔

لمہ وتن بلوچستان نا ہر کُنڈ ہر پارہ غا ہر پیر و کماش و زالبول نا ہر مش ہر خل ہر تلار ٸٹی مڑداتا کسہ غاک تالان ءُ و مڑد آک وتن نا دڑد ءِ تخسا تینا اینو نا زند ءِ لس بلوچ خاہوت نا رژنا و آسراتی کن ندر کریر۔

کنا جند ہرا وخت آن کسہ بننگ یا خواننگ نا لاٸخ مسونُٹ تو ساندہ ہراڑے بادری نا کسہ اس کس بنفینے تو او وتن ٸسے نا شہید و غازی ٸسے نا مسونے اندن ہرا وخت مڑد ٸسے نا باروٹ کتاب خوانانُٹ تو اوڑے دا لوز آک نوشتہ مسونو کے شہید ہچبر کسپک او ساندہ زندہ سلک، مچا جہان نا تاریخ ٸٹی اونا جون الّمی جتا مریک ولے اونا سوچ، فکر، فلسفہ، نظریہ و مشن زندہ سلِک اندون اینو لمہ وتن بلوچستان نا ہر کڑدار زندہ ءِ۔

شہید صمد عرف شیرا ام اندا کڑدار، اندا مڑد آتان ءِ ہرا اینو آن ہفت سال مُست ہمو خیسُن ءُ ٹپ انگا مش ٸٹی شہید مس ہراڑے شہید پھلین امیر “ایسری سُم” ٸنا فلسفہ ءِ وجود ٸٹی ایس، شہید ضیاء عرف دلجان ٹک تیر نا پن ءِ کٹا، شہید گزین بادری نا مثل ءِ مونا تخسا دژمن ءِ دا کلہو تس دا ڈغار ننا ءِ دانا خواجہ غاک نن اُن دانا ہر ملکیت ننا ءِ داڑا ہرا وخت اسکان غیر ءُ راج ٸسے نا کوزہ مرو ہمو وخت اسکان نن شہید محراب، بابو نوروز، شہید فدا، جنرل اسلم و چاکر جوڑ مرسا کرون نن تینا سینہ غاتے نُما سم تا پارہ غان ترسا آجوٸی نا سہب ٸکے ندر مرسا کرون۔

اندا بادری نا سوب آن بابا خیر بخش مری “جرنل شیروف” نا پاریکہ کے دا شیروف ننا “شیر” ءِ اندون اینو شہید صمد ام تینا بادری و مخلصی نا سوب آن شیرا نا پن اے کٹا۔

شہید شیرا نا تعلقداری 14 سالی آ مجید کونگا شیر آتا خاہوت آن مریک ہرا اسکول خواننگ نا وخت آ وتن نا جنگ ٸٹی ساڑی ئسر۔