بلوچستان نا بنجائی شار کوئٹہ و پنجگور آن پاکستانی فورسز تا دو آن دزگیری آن گڈ بیگواہ مروکا مسہ بندغ یلہ مسر۔
یلہ مروکا منیر احمد زہری ءِ تدوکا توہ سی ٹی ڈی و ایلو سیکورٹی ادارہ غاک برما ہوٹل کوئٹہ آن ہموتم دزگیر کریسہ بیگواہ کریسر ہراتم او ہمو جاگہ غا ہندی ئس۔
استاد منیر نا یلہ مننگ نا پک ءِ علاقائی حوال آک کرینو۔
گیشتر حوال تا رد ئٹ تدوکا توہ کوئٹہ آن زوراکی ئٹ بیگواہ مننگ نا گواچی مروکا ضلع خضدار نا تحصیل زہری نا ہندی استاد منیر احمد یلہ مریسہ اُرا غا سر مسونے۔
بلوچستان ئٹ زوراکی وڑ ئٹ بیگواہی نا ویل آک بھاز وخت رپورٹ کننگانو۔
خضدار زہری نا ہندی ارا ورنا عرفان زہری و قادر کنول ہم تدوکا توہ زوراکی ئٹ بیگواہ مننگ نا گواچی مسوسر ہرا داسکان یلہ کننگتنو۔
پین حوال ئسے نا رد ئٹ چار ستمبر آ کوئٹہ آن فورسز آتا دو آن بیگواہ مروکا منیب بڑیچ یلہ مریسہ ارا غا سر مسونے۔
منیب بڑیچ ءِ چار ستمبر آ پاکستانی فورسز آک کوئٹہ سریاب روڈ آ بلوچستان یونیورسٹی نا مونا شفیع کالونی آن اسہ اُرا ئسے آ چھاپہ خلیسہ دزگیر کریسہ بیگواہ کریسر۔
منیب علی کوئٹہ ڈگری کالج ئٹ ایف ایس سی نا خوانندہ ئسے۔
اندن اسہ پین حوال ئسے نا رد ئٹ نجیب بلوچ ہم یلہ کننگانے۔
یانزدہ اگست آ پنجگور آن بیگواہ مروکا نجیب بلوچ یلہ مریسہ ارا غا سر مسونے۔
اہلخانہ نا رد ئٹ نجیب عرب امارات ئٹ کاریم کریکہ ہرا چھٹی تا ایسر مننگ آن گڈ واپس ہننگ اس کہ فورسز آک اودے پنجگور آن دزگیر کریسہ بیگواہ کریسر۔
نجیب بلوچ نا لمہ و ہیڑ اسماء اونا بیگواہی آن گڈ برانز کننگ ئسر۔
یاتی مرے نجیب بلوچ بیگواہ جمیل بلوچ نا مار ء ہرادے 29 اپریل 2013 آ بلوچستان نا ضلع آواران آن پاکستانی فورسز آک اغواء کریسہ بیگواہ کریر و داسکان بیگواہ ء۔
بلوچستان ئٹ بیگواہ بندغ آتا مسئلہ غاک دے پہ دے بد و حالیت اختیار کننگ ءُ۔
بلوچستان نا سیاسی جماعت و تنظیم آتا پارہ غان بیگواہ بندغ آتا یلہ کننگ کن تدوکا بھلو وخت ئسے آن کوشست آک برجاء ءُ و داڑتون اوار کوئٹہ پریس کلب نا مونا اسہ سال آتیان بیگواہ بندغ آتا خاہوت آک ہم برانز کننگو۔