حوال تا رد ئٹ بلوچ خوانندہ کونسل نا پارہ غان حفیظ بلوچ نا زوراکی ئٹ بیگواہی نا برخلاف اسلام آباد ئٹ مسہ دے ئی ءُ برانزی کیمپ ئس ہڈ تننگا۔
برانزی کیمپ اسلام آباد قائداعظم یونیورسٹی پنڈی پوائنٹ آ ہڈ تننگا کیمپ ئٹ بھلو کچ ئسیٹی خوانندہ غاک اوار مسر اندن خوانندہ غاک یونیورسٹی نا تہٹی اسہ چُپ ءُ ریلی ئس ہم ٹہفیر۔
برانز کروک آتا پاننگ اس کہ بلوچ خوانندہ تیا ریاستی کریک ڈاؤن خوانندہ تا بیدس قانودی زوراکی ئٹ بیگواہی راہبند ءُ بندغی حق آتا برخلاف ءِ خوانندہ سنگت آتا یلہ کننگ کن ہر مننگ کروک گام ءِ ارفنہ۔
یاتی مرے حفیظ بلوچ برجاء توہ 8 فروری آ بلوچستان نا شار خضدار آن دزگیری آن گڈ بیگوا کننگا۔ حفیظ بلوچ نا تعلقداری بلوچستان نا ضلع خضدار آن ءِ و او قائداعظم یونیورسٹی اسلام آباد ئٹ ایم فل نا گڈیکو سال نا خوانندہ ئسے۔
حفیظ بلوچ نا زوراکی ئٹ بیگواہی و پنجگور ئٹ خوانندہ تا کسفنگ نا برخلاف تدوکا دے تیٹ خوانندہ تا پارہ غان اسلام آباد ئٹ اسہ ریلی ئس کشنگاسس خوانندہ غاک اسلام آباد پریس کلب نا مونا برانزی مچی کریر اندن حفیظ بلوچ نا زوراکی ئٹ بیگواہی نا برخلاف خضدار ئٹ سول سوسائٹی اسہ برانزی ریلی ئس کشاسس۔