بلوچستان نا ضلع ڈیرہ بگٹی ٹی ہندی تا پارہ غان ڈیرہ بگٹی ئٹ گیس و ایلو قدرتی مڈی تے کشوکا کمپنی نا برخلاف برانز کننگا و ریلی ئس ہم کشنگا۔
ڈیرہ بگٹی نا ہندی تا پاکستان پٹرولیم لمیٹڈ (پی پی ایل) نا پارہ غان ایلو صوبہ تے گیس نا تننگ و ڈیرہ بگٹی ٹی گیس نا مفرنگ تون اوار پی پی ایل کمپنی ٹی ہندی بندغ آتا جاگہ غا پنجاب و ایلو شار آتا بندغ آتے روزگار ایتنگ نا برخلاف نرانزی ریلی ئس کشنگا۔
برانزی ریلی یوتھ کونسل ڈیرہ بگٹی نا پارہ غان کشنگا برانز کروک آک پی پی ایل نا دفتر نا مونا مچی کریسہ بیدس ہندی افسر و مزور آتا کسر ء بند کریر۔
برانز کروک آتا پاننگ اس کہ بلوچستان آن خننگوکا گیس تیوہ پنجاب تون اوار پاکستان نا کارخانہ تیٹ استعمال مریک اوڑے اُرا اُرا ٹی ڈیرہ بگٹی آن گیس تننگک ایلو پارہ بلوچستان نا چنکا شار تیٹ گیس مفک و دا دور ئٹ ہم بلوچستان نا بندغ آک جنگل تا پاٹ آتے مچ کننگ کن بیوس ءُ۔
برانز ئٹ بھلو کچ ئسیٹی ہندی خوانوکا ورنا انجینئر و ایلو ڈپلومہ ہولڈر آک اوار ئسر۔
برانز کروک آک پاریر کہ اسہ پارہ غان بلوچستان نا ہندی خوانوک آ انجینئر و ڈپلومہ ہولڈر آک بے روزگار ءُ ایلو پارہ غان پی پی ایل کمپنی ہندی بندغ آتا جاگہ پنجاب و سندھ نا بندغ آتے بلوچستان ٹی کاریم ایتک۔
برانز کروک آتا پین پاننگ ئس کہ دا نا انصافی بیرہ بلوچستان نا بندغ آتون برجاء تخنگانے بلوچستان ئٹ ٹہفوکا کمپنیک تینا رویہ تیا نظر تخیسہ ہندی بندغ آتا حق آتا پلنگ ء بند کیر۔
برانز کروک آک خواست کریر کہ پاکستان پٹرولیم لمیٹڈ ڈیرہ بگٹی نا ہندی تون اوار تینا معاہدہ غا عمل کریسہ ڈیرہ بگٹی نا خوانوکا بندغ آتے ہر اِرا سال 25 انجینئر و ڈپلومہ ہولڈر تے کاریم ایتے نکے برانز نا لڑ پین زیات کننگک۔