سیندک: چینی کمپنی نا برخلاف بلوچ زالبول آتا برانز

بلوچستان نا ضلع چاغی ٹی خیسن و پین مڈی تا علاقہ سیندک ٹی کاریم کروک چینی کمپنی نا پارہ غان کورونا ایس او پیز نا پن آ ہندی بندغ آتا ہن و بر آ سخت رکھ، کہی تو قرنطین نا پن آ ملازم آتے بند تخنگ نا بر خلاف ہندی ملازم تا خاہوت آتا پارہ غان برانز نا لڑ برجاہ ءِ-

چینی کمپنی نا پالیسی تا بر خلاف برانز تدوکا دے تیٹ زالبول تا پارہ غان  بناء کننگا، اینو زالبول آک 10 کلومیٹر اسکان پند کریسہ تینا برانز ءِ ریکارڈ کریر اندن ایلو پارہ غان نرینہ ملازم آک ہم کمپنی نا تہٹی تولوک برانز ئٹی ءُ –

ہندی صحافی ئسے نا رد اٹ برانز آن گڈ سیندک پروجیکٹ ٹی بست و بند بجلی و ڈی ایس ایل انٹرنیٹ سروس بند کننگ آن گڈ کمپنی ٹی موبائل نیٹ ورک سروس ءِ ہم بند کریسہ ملازم تا پیشن حوال کننگ ءِ بند کرینے۔

ہندی صحافی نا رد ئٹ چینی کمپنی بست و بند نا دا  عمل آن خلیس نا درشانی مریک کہ پروجیکٹ بست و بند ملازم و زالبول آتا برانز ءِ ڈھکنگ نا کوشست کرو-

حوال تا رد ئٹ برانز ٹی زالبول تون چناک ہم  اوار ءُ ہرافک کورونا نا پن آ ہندی بندغ و ملازم تا زند ءِ بھس کروک چینی کمپنی ایم آر ڈی ایل و پاکستانی آفسیر تا برخلاف ترند نعرہ خلکنو۔

یاتی مرے سیندک ٹی چینی کمپنی کرونا بست و بند نا پن آ علاقہ ٹی دکان و اسکول آتے بند کرینے اندن پروجیکٹ آ کاریم کروک مزدور تا ارا غا  ہننگ آ پابندی تون اوار  ایلو کارروائیک تدوکا کہی تو تیان برجاہ ءُ  اندن ہندی بندغ آک و پروجیکٹ مزدور تا رد ئٹ  بست و بند ایس او پیز نا پن آ اوفتے زندان تیٹ بند کرینے۔

ہندی ملازم تا رد ئٹ سیندک پروجیکٹ آ کاریم کروک کہی مزدورک تینا استعفیٰ اسکان تسونو ولے کمپنی نا رویہ ٹی اسہ وڑ ئنا خلکنی بتنے-

برانز کروک آتا پاننگ ءِ کہ اوفتا نرینہ ملازم آتے شش تو اسکان ارا غا بننگ نا موکل تفیسہ اندن ہندی بندغ آتے دارو نا آسراتی تیکن سیندک ہسپتال اسکا  ہننگ نا موکل اف و علاقہ ٹی ایس او پیز نا پن آ تیوہ ہن و بر آ  پابندی خلیسہ علاقہ ءِ نو گو ایریا جوڑ کرینو-