چیدہ ءِ زگرین
نوشت:عتیق آسکوہ بلوچ
دی بلوچستان پوسٹ
ہراتم لوز مرینہ نا تینا سنگت الیزینڈر پارا تون اوڑدئی مس او وخت او ٹپ آتے درمان کریکہ و مُتکنا ڈول نا ازباب آتا کمک ئٹ ٹپی تا بدن تیان آئنی ٹُکر تے کشاکہ۔
لوز مرینہ نا تعلقداری شعبہ طب تون ئس و الیگزینڈر پارا تینا سنگت چھاپہ مار آتے ہمو مارکسی اصول تا تعلیم تننگ ئس ہرافتا سوب اوفتا دا تنظیم ٹہیفنگاسس۔
“ننے سلاء بند جہد ئٹ ننا مابت رسینگا” پنجا و یک سالہ “پارا” تینا سنگت نا پارہ غا مابت تون اُریسہ پارے۔ دوارہ اوفک ہمو وخت ءِ یات کریر ہراتم 1992 ئٹ کولمبیا نا مین ہلوک ہند آتیان پُر علاقہ آتیٹ اوفتا اولیکو خننگ مسوسُس۔
ولے امر کہ زو ہڑتوم آتے اسٹ ایلو تون مابت مس ہموخس زوت اوفتے جتا جنگی سنگر تیا رادہ کریسہ جتا کننگا و دوارہ او بیست سال اسکان اسہ ایلو ءِ خننگ کتور۔
مرینہ گمان کرے کہ پارا خلنگانے، داڑاسکان کہ 2017 نا تاریخی امن معاہدہ آن گڈ جشن ئنا وختا دے ٹکی پَٹ آتا مُر کیمپ ئٹ اوفتا نا گمانی اوڑدئی مس۔ و دا مابت کروک آ مار مسڑ جنگول آک اسٹ ایلو تون اسیکہ وا اوار مسُر۔
جنگ آک بے رحم مریر، جنگ آتیٹ تینا مابت، اُرا، لمہ باوہ و چنا تے ندر کروئی تمک ولے ہراتم اسہ راج اس وختی آن بُھس کاری تا مون ئٹ مرے اوڑکن گڑا جنگ بے رحم مفک بلکن او وختی آن کوزہ گیر نا بے رحمی تا گواچی مریک، اودے دشمن کور گُم کیک، بے دادی کیک، اونا جوْن ءِ گیاوان ئٹ چغل ایتک، اودے بیماری تا مون ئٹ ایتک، او روڈ شکست آتیٹ کہک، او لنگڑی آن کہک۔
ہمو راج آک کہ تینا حالیت و گواچنی ویل ءِ سرپد مریسہ فیصلہ ئسے آ سر مریرہ کہ بے دادی نا ورندی بیرہ بے دادی ئٹ تننگ مریک گڑا اوفک سلاء بند مریرہ، اوفک ناجوڑی، لنگڑی، روڈ شکست آتیٹ کہنگ نا جاگہ غا ہکّل ترسہ، کوزہ گیر ءِ دکّ خلیسہ مرک ءِ بخیر کیرہ و اوفک کوزہ گیر ءِ باور کریفرہ کہ نے تینا ڈیہہ آن کشیسہ تینا بروک زنک ءِ آسراتی بشخوٹ۔
نوشکے نا خلق جمالدینی آن تعلق تخوک ورنا میرین جمالدینی اندا حالیت آتے ماریسہ، پوہ مریسہ فیصلہ غا سر مریک کہ تینا ڈیہہ و تینا راج اکن سلاء بند مروئی ءِ، او شُور و نوشکے نا مش تیٹ اندا فیصہ تون نن و دے خواری کشک، راج اکن تینا ذات ءِ پد بٹک۔ مسہ سال مالو مش تیٹ سنگر کروک ورنا میرین، شہید گنجل نا سیخا ٹی انداخس پختہ مریک کہ فیصلہ نا ایسری ٹِک آ سر مریک۔
ورنا غا میرین تینا مابت ءِ خنتا مون آ خنک و ودار مریک کہ ہراتم او تینا مابت ءِ خمب کرو۔ میرین نا مابت بڑز بالاد، و گچین رنگ ءُ مسڑ اس آخہ بلکن اونا وطن مریک۔ او تینا ایسری کلہو تیان اسٹ اٹ مخیسہ پائک کہ مننگ کیک کہ کنا جوْن ءِ نم دوئی مننگ کپرور، دا ورنا تینا مابت ءِ خمب کننگ کن تینے آ شورہ تفک و دشمن ءِ نیست کریسہ وطن نا گہوش تون آوڑدہ مریک۔
فدائی بیرہ عمل اس اف بلکن فدائی ہمو سلاء ءِ کہ تاریخ اٹ اونا باب اٹ سرسہبی نوشتہ ءِ۔ ہرانا زوت مثیال اوغانستان آن امریکہ نا نرنگ ءِ۔ ہچ ءُ شک اس اف جنگ اکن ایلو خواست آک مریرہ ولے اوغانستان ئٹ جنگ ئنا دروشم ءِ بدل کروک اندا فدائی جلہوک ئسر۔ داڑے گچین آ ہیت دادے کہ بلوچ نا جنگ ئٹ پوسکنو دروشم اس ہتوک فدائیک نہ مذہب نا زی آ دا فیصلہ ارفنگ ءُ نا جنت ئسے نا جوفہ اٹ بلکن اوفک تینا ہر کلہو اٹ بیرہ وطن و راج ئنا ہیت کرینو و اندا گڑا اینو جہان ءِ گوڑیفین ءِ کہ دا سوچ ئٹ بلوچ آک امر دُن فیصلہ ارفنگ ءُ۔
آپریشنل گنجل نا سرسہبی و دژمن نا بے تغی تا بابت پین وختس ہیت کننگ مرو ہرافتے اسہ نوشت اٹ ہتنگ مفک۔ اینو میرین تون اوار پانزدہ سنگت جہان ءِ ہمو دروشم ءِ نشار تسر ہرانا اوفتے گمان اَلو، و بلوچ راج ءِ کلہو تسر کہ جنگ بیدس ترندی آن ہچ ءُ بدلی ہتپرو بلکن داڑکن بھلو فیصلہ ارفوئی مرو کہ دژمن بے وس مریسہ دا ڈیہہ آن نرے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔