برازیل ئٹ پولیس نا پٹ و پولی ٹیم پارینے کہ اسہ بندغ اس ایمازون نا علاقہ ئٹ کور گم مروک برطانوی حوالکار و ہندی بندغ نا کسفنگ نا ہیت ءِ منانے۔
حوال تروک ادارہ اے پی نا رپورٹ نا ردئٹ دزگیر مروک گمانی ڈوہدار پولیس افسر آتے ہمو ہند آ ہم درے ہراڑے جوْن تے کڈ کنگاسس۔
پولیس افسر آک منوس ئٹ حوالکار آتیتون ہیت ئنا وخت آ پاریر کہ کیس نا بنجائی گمانی ڈوہدار ڈو ءِ منانے و پارینے کہ پنچ جوْن آ کور گُم مروک ہڑتوما بندغ تیتون انت مس۔
فیڈرل پٹ و پول کروک ایڈوارڈو الیگزینڈر فونٹس نا ردئٹ 41 سالہ اماریلڈو ڈا کوسٹا اولیوریا پِن کروک پیلاڈو پولیس ءِ پارے کہ او ہندی بندغ برونو پریرا، و برطانوی فری لانس حوالکار ڈوم فلپس ءِ کسفنگ کن خاخری سلاء کاریم ئٹ ایس۔
پٹ و پولی کوالخواک پاریر کہ چار شمبے نا دے گمانی ڈوہدار نا نشان تس آ پولیس ہمو ہند آ ہنا ہراڑے جوْن تے کڈ کننگاسس و اوکان کہوک آتا پد بچوک آتے کشنگا۔
پٹ و پولی افسر آتا پاننگ ئس کہ ‘دا کیس ئٹ اوار ایلو بندغ آتے ہم زوت دزگیر کننگ مرو۔
ریاست امازونس نا پولیس کوالخوا تا ردئٹ کور گم مروک بندغ آتا کشتی دائسکان خننگتنے واہم پولیس ءِ ہمو علاقہ نا سما تمانے ہراڑے گمانی ڈوہدار آک اودے ڈھکانو۔
کوالخواک پاریر کہ ‘اوفک کشتی ئٹ گندہ گڑس نا بھلو بھلو باچکا تخاسر ہراڑان او ڈبینگاسس۔’
چِل و یک سالہ پریرا و 57 سالہ فلپس ءِ گڈیکو وار جویری وادی ئٹ دریا ئٹ کشتی ٹی سفر کریسہ خننگاسس۔ دا علاقہ نا سیم آک پیرو و کولمبیا تون لگیرہ، دا علاقہ ئٹ مچھی ہلوک، شکاری و سرکاری ایجنٹ آتا نیامٹ جیڑہ آتیٹ بے دادی تا تدینیک ہم مریرہ۔
پن کروک بندغ تا کور گم مننگ آن گڈ معلومداری ہمو وخت مونا بننگ بناء کرے ہراتم گمان ئٹ اسہ بندغ ئسے دزگیر کننگا۔