بلوچ اسٹوڈنٹس کونسل اسلام آباد نا کنڈ آن بیگواہ بلوچ خوانندہ فیروز بلوچ نا زورانسری بیگواہی و آجو نہ مننگ نا برخلاف ایرڈ ایگریکلچر یونیورسٹی نا ڈن آ برانزی کیمپ ہڈ تننگانے۔
کیمپ ئٹی خوانندہ آ تتون اوار بیگواہ فیروز بلوچ نا باوہ نور بخش بلوچ ہم اوار مریسہ تینا مار ئنا آجوئی کن برانز کننگ ءِ۔
فیروز بلوچ نا باوہ نا رد ئٹ او 17 سالہ فیروز بلوچ نا زند ئنا بابت ئٹ خُلینگ ءُ۔ او پارے کہ غٹ تپہ آ تیان تعلقداری تخوک بندغ آک خاص وڑ ئٹ خوانندہ آ تیان خواست کیوہ کہ او ننا بین برانز کیمپ ئٹ اوار مریر و کنا مار ئنا رکھوک آجوئی نا خواست کیر۔
خوانندہ فیروز بلوچ نا آجو نہ مننگ نا برخلاف برانز آ تولوک سنگت خوانندہ آتا پاننگ ئس کہ کیچ آن تعلقداری تخوک فیروز بلوچ ائیریڈ یونیورسٹی راولپنڈی نا خوانندہ سے ہرادے تدوکا تو یونیورسٹی آن لائبریری آ ہننگ نا وختا نادرست آ بندغ آک بیگواہ کریسر۔
بیگواہ خوانندہ نا سنگت آتا رد ئٹ فیروز بلوچ ءِ ملکی ادارہ آک دزگیر کریسہ بیگواہ کرینو۔ خوانندہ آک پاریر کہ داکان مُست ہم بلوچ خوانندہ آتا پنجاب نا شار تیان خوانندہ آتے زوراکی ئٹ بیگواہ کننگ ئٹی سی ٹی ڈی و ڈھکوک ادارہ آک تُد مسنو۔
یاتی مرے، بلوچ خوانندہ آتا پنجاب آن زوراکی ئٹ بیگواہ مننگ نا تدینی تا چرجوئی متکن ءِ داکان مُست لاہور، فیصل آباد، ملتان، اسلام آباد، بہاولپور ئٹی ہم خوانندہ آتے دزگیر کریسہ بیگواہ کننگانے ہرافتیٹی برجاء سال لاہور پنجاب یونیورسٹی آن بیبرگ بلوچ، اوکان مُست زکریہ یونیورسٹی بھاولپور آن یاسین بشام و اسلامیہ یونیورسٹی بہاولپور نا ایجوکیشن ڈیپارٹمنٹ نا تھرڈ ایئر نا خوانندہ الطاف نصیر بلوچ اوار ءُ۔
بلوچ خوانندہ آتا زوراکی نا بیگواہی تا وختا خوانندہ بیبرگ بلوچ نا سی ٹی ڈی نا دو آن بیگواہ مننگ نا فوٹیج ہم شینک مسس ولے دا تدینی آن گڈ بیبرگ بلوچ تون اوار ایلو خوانندہ آک ہم آجو مسر۔
بلوچستان ئٹی زوراکی نا بیگواہی تا برخلاف توار بڑز کروک تنظیم وائس فار بلوچ مسنگ پرسنز نا رد ئٹ ہزار آتا کچ بلوچ ریاستی ڈھکوک ادارہ و فورسز آتا دو آن زوراکی نا بیگواہی تا گواچی مسنو ہرافتیٹی گیشتری کچ بلوچ خوانندہ آتا ءِ۔ تنظیم نا رد ئٹ بلوچستان، سندھ، پشاور، و پنجاب نا جتا علاقہ آتیان بلوچ خوانندہ آتا سیکورٹی ادارہ آتا دو آن بیگواہی نا حوال رسینگانے۔
تنظیم نا ودیک پاننگ ئس کہ زوراکی نا بیگواہی تا لسٹ ئٹی زالبول و چنا ہم اوار ءُ۔