بنگلہ دیش ئٹی بشام نا پر تا سوب آن کم اس کم 25 بندغ بیران و سیلاب آتا بھس کاری آن چھل لکھ ئنا کچ بندغ زیمی مسنو۔
بنگلہ دیش نا شیفینکو علاقہ آ تیٹ لکھ آتا کچ بندغ آ تیکن سیلاب اسہ خطرہ اس ئس ولے چاہندار آتا پاننگ ءِ کہ مُد ئنا بدل مننگ نا سوب آن دننگا سیلاب آتا کچ و بھس کاری نا تاغت چاننگ مفک۔
تدوکا ہفتہ ٹی اسہ وڑ پر مننگ نا سوب آن ڈیہہ ئنا قطبی و دے ٹکی علاقہ آتے دیر ارفینے و حکومت نا کنڈ آن اوڑے گٹ مروکا بندغ آتا کمک کن فوج ہم ساڑی ءِ۔
دیر ئنا زور آن جھل تا بند آک پننگ ءُ، و خلق آتا خلق آتے دیر ارفنگ ءِ۔ حکومت ہندی سکول آتے کمکی کیمپ آ تیٹ مٹ کرینے۔
ریسکیو مروک عاصمہ اختر پنی ءُ اسہ نیاڑی سے نا پاننگ ئس کہ او کُل تدوکا اِرا دے آن سیلاب آ تیٹ گٹ ئسر و دیر بڑز بننگ ئس۔ عاصمہ نا رد ئٹ اونا خاہوت نا بندغ آک اِرا دے آن بینگن ئسر۔ اونا پاننگ ئس کہ ”دیر اندن تیزی ئٹ ودنگ ئس کہ نن تینا ہچ گڑاس ہم ہفنگ کتون۔ وختس کہ غٹ گڑاک دیر ئنا تہٹی ئسر تو نن امر گڑاس بسنگ کرینہ؟
پولیس کوالخواہ و نیوز ایجنسیک اے ایف پی ءِ پاریر کہ گروک تمنگ آن دا جاندمی ایشیائی ملک ئٹی جمعہ نا اِرا نیمروچ اسکان کم اس کم 21 بندغ بیران مسنو۔
کوالخواک بروکا دے تیٹ بیرانی تیٹ ودکی نا خلیس نا درشانی ہم کرینو۔ ہندی پولیس افسر منظور رحمان نا پاننگ ئس کہ گروک تمنگ آن بیران مروکا تیٹ مُسہ چُنا ہم اوار ءُ، ہرافتا سن 12 آن 14 سال نا نیام ئٹ پاننگک۔
پولیس انسپکٹر نورالاسلام نا پاننگ ئس کہ دریابی شار چٹاگانگ ئٹی پین چار بندغ بیران مسنے۔
سلہٹ ریجن نا چیف گورنمنٹ ایڈمنسٹریٹر مشرف حسین نا رد ئٹ دوکا نیمروچ آ پرک مچٹ بس کریسر ولے ہفتہ نا سہب آن سیلابی حالیت پین خراب مننگ ءِ۔ مشرف حسین نا رد ئٹ دا مُچا علاقہ ٹی بجلی نا بست و بند بھس مسنے۔ اونا پاننگ ئس کہ ”سیلاب آتا سوب آن حالیت باز خراب ءِ۔ چھل لکھ آن گیش بندغ سیلاب ئٹ گٹ ءُ۔‘‘
سیلاب نا سوب آن سلہٹ ئٹی ملک ئنا مسٹمی غٹ آن بھلا جہانی ائیر پورٹ ءِ ہم بند کننگانے۔
مُد ئنا چاہندار آتا رد ئٹ بروکا اِرا دے ٹی بنگلہ دیش و انڈیا نا شمال مشرقی بڑزینکو علاقہ آ تیٹ سخت پر ئنا سوب آن سیلابی حالیت پین بگڑینگو۔