افغانستان نا دارالحکومت کابل ٹی مروک بمب تراک آن 22 بندغ ٹپی مسُر ۔
پیشن ملکی ایجنسی تا حوال آتا ردئٹ تراک کابل نا مصروف تجارتی علاقہ ٹی مس ہراٹی 22 بندغ ٹپی مسونو، خن خنوک بندغ آتا پاننگ ءِ کہ تراک آن بیران مننگ نا ہم خُلیس ءِ۔
افغان وزارت داخلہ نا ترجمان نا ردئٹ ہمو جاہ آ سیکورٹی کارندہ آک رسینگار ہرا دمدستی کمک کاروائی تون اوار پٹ و پول کننگ ئٹ اختہ ءُ۔
عاشورہ آن مالو مروک بمب تراک نا ذمہ واری جہانی دہشت گرد گل داعش ارفینے۔
یاتی مرے کہ تدوکا دے ہم کابل ٹی اسہ بمب تراک نا سوب آن 8 بندغ مرگ نا گواچی و 18 ٹپی مسوسُر اونا ہم نا ذمہ واری شدت پسند تنظیم داعش ارفیسس ۔
داعش دعویٰ کریسس کہ جلہو آن 20 بندغ بیران و گیشتر ٹپی مسونو واہم افغان پولیس کارندہ آک 8 بندغ نا مرگ نا گواچی مننگ نا پک کریسُر ۔