زندگی اس مِلّیتو دا آب نا
انت کیو ای، قصہ ءِ سیلاب نا
وا غریب اس، پین غریبی ٹی ہنا
ڈُکھ بازس پین ڈکھاتے خنا
مال مڈی مس گواچی دِیرنا
بس گڑائس او ہم جیبٹ میرنا
ایکا بیماری تہ اُر، ترشاغیرہ
اِڷ وخڷٹ دے ءُ نن دُن جاگیرہ
تس دُنیا باز نن ہچ خنتون
حق رسینگا دا غریبے خنتون
سیرو پُر نا ماڑی ءِ بڑزا خنان
عید بس اوتیکے دا الّو گمان
بش مہ بیوس پین کس انتس ترو
تین کہ تینٹ کے گڑائس سوبرو
حالتے بدلیف تینا، ہمت اٹ
سوچہ تینکہ جوان سوچہ دا ردٹ
مُچ کہ زیزادے، مخے تف کل ئنا
بِجّ و دس نی داڑے تینکہ پھل ئنا
نوح ئنا سیلاب ہراڑے بسونے
بندوبستس اوڑکہ واہم مسونے
نہ تو لگّک وا جتائی نا توار
داسہ ہم وخت ءِ کبو جوانو کشار
زو بہ شیدا دُو پہ دُو ولدا الین
بس اسّٹی نا توار نن وا خلین
شاعر: شابیگ شیدؔا
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔