بلوچ خوانندہ آک تینا خواست آتا حق ٹی تولوک برانز کریر۔
اسلامیہ یونیورسٹی بہاولپور پنجاب ٹی بلوچ خوانندہ آک جامعہ بست و بند نا پارہ غان بد نظمی، آسراتی تا وے تننگ نا برخلاف برانزکریر، خوانندہ آک جامعہ نا بنجائی درگہ نا مونا برانز کریسہ توسُر ہراڑے درزن آتا کچ و گیشتر شار تیان خوانندہ آک برانز ٹی اوارمسُر۔
برانز کروک آ خوانندہ آتا پاننگ ءِ کہ جامعہ اسلامیہ یونیورسٹی بہاولپور ٹی مُر نا علاقہ آتیان بروک خوانندہ آک سخت ویل آتا گواچی ءُہاسٹل آتا کمبوتی و جامعہ بست و بند نا پارہ آن بلوچ خوانندہ آتے تعصب نا گواچی کننگ ءُ ہرا نا برخلاف خوانندہ آک برانز بناءکرینو۔
بلوچ خوانندہ آتا ردئٹ جامعہ ٹی 2013 آن برجاء بلوچ خوانندہ آتا ریزرو سیٹ آتے ایسر کریسہ خوانندہ آتیان فیس خوائنگ برجاء ءِ ہرابلوچ خوانندہ آتون اوار اسہ بھاز بھلو نا انصافی ئسے جامعہ بست و بند بلوچستان آن بروک خوانندہ آتے دزگیر کریسہ پروفائلنگ ناگواچی کننگ ءِ۔
برانز کروک آتا خواست ءِ کہ اسلامیہ یونیورسٹی بہاولپور بلوچ خوانندہ آتیکن ریزرو سیٹ آتے بحال کریسہ بلوچ خوانندہ آتا پروفائلنگ ءِبند کے۔
برانز کروک آتا گیشتر پاننگ ءِ کہ بلوچستان ٹی تعلیمی بست و بند نا بد حالیت نا سوب آن بلوچ خوانندہ آک بیوس مریسہ پنجاب ناتعلیمی ادارہ آتا پارہ غا مون کیرہ تاکہ تینا خواننگ ءِ پُورَو کیر ولے داڑے ہم بلوچ خوانندہ آتیکن تعلیم دوئی کننگ کِن ڈغار ءِ تنگ کننگئٹی ءُ۔
برانز کروک آتا پاننگ ئس کہ تیوہ پنجاپ ٹی گیشتر صوبہ آتیان بروک خوانندہ آتون دا رویہ برداشت آن پیشن ءِ۔ بست و بند تینا رویہ ءِبدل کریسہ خوانندہ آتا پروفائلنگ ءِ بند کے نہ تو خوانندہ آک تینا جائز خواست آتا حق ئٹی برانز ءِ شابیتی ایتور۔