82 سن ئنا فرانسیسی ناول نوشتکار اینی ایرنو نا نوشک آک جرمن، سویڈن و انگریزی بولی تون اوار کہی بولی تیٹ مٹ مسونو۔ او تپئی و صنفی فرخ نا پد ئنا ندارہ ءِ خوڑتی تون اوار سادہ بولی ئٹ نوشتہ کننگ نا سوب آن پنی ءِ۔
اونا نیمہ زند نوشت (Biography) ناول تیٹ خلقی زند نا دروشم و تپئی فرخ ءِ سادہ بولی ئٹ درشان کننگ کن کاریم ئٹ ہتوک آ جملہ تا زیات کاریم ئٹ ہتنگ خواننگ کن رسینگک۔
او صنفی فرخ نا زی آ و ہڑتوما جنس تا باروٹ تپئی و چاگڑدی فرخ ءِ مونا تخیسہ نوشتہ کرینے۔
اونا 27 کتاب فرینچ بولی ٹی شینک مسونو، ہرافتیان بھاز آک انگریزی و یورپی بولی تیٹ مٹ کننگانو۔ اونا کہی نوشت آک فرانس ئٹ نصاب نا بشخ ہم اریر۔
اینی ایرنو ارٹمی جہانی جنگ نا وخت آ نارمنڈی نا خلقی علاقہ ٹی غریب ءُ خلق اسیٹ ودی مسوسس۔ بنائی خواننگ ءِ دوئی کننگ آن گڈ او استاد ئسے نا وڑ ئٹ تینا کیریئر ءِ بناء کرے، داڑتون اوار خواننگ ءِ ہم برجاء تخا و پدا جتاء ادارہ تیٹ پروفیسر ہم گچین کننگا۔
نوبل کمیٹی اینی ایرنو نا ادبی خذمت آتا صفت ءِ کریسہ اودے خلقی زند نا پد ئنا ندارہ تون اوار تپئی بست و بند ءِ مونا تخیسہ کسہ نوشتہ کننگ آ داد تس۔
نوبل داد نا پڑو آن گڈ اینی ایرنو اسہ بیان اسیٹ پارے کہ کنا نظر ئٹ نوشت کننگ اسہ سیاسی کاریم ئسے، ہرانا رد ئٹ چاگڑدی وے برابری مونا اتنگک۔ او قلم ءِ چاقو نا وڑ کاریم ئٹ اتیسہ چاگڑد آ تموک پردہ تے کپ چُنڈ کیک۔
اینی ایرنو نا اولی ناول “لیس آرموائرس وائڈز” (اورک آ الماری) 1974 ٹی شینک مسوسس ولے او 2008 ئٹ “لیس اینیس” نا شینک مننگ آن گڈ جہانی پڑ آ پنی مس۔ دانا مٹ 2017 ٹی شینک مسوسس۔
ایرنو تینا تپہ نا باروٹ نوشتہ کرے و پارے کہ ہرا وڑ او تینا خواری کروک تپہ نا پد نا ندارہ آ سلوک فرانسیسی بورژوازی نا خواست و عادت آتے تینا کننگ کن جہد کریرہ۔
ایرنو نا 2000 ئٹ شینک مروک ناول “ہیپننگ” 1960ء نا دہائی ٹی فرانس ئٹ چنا بِٹفنگ ءِ وے قانودی پاننگ و او وخت ئٹ اونا جند ئنا چنا بِٹفنگ نا اسہ آزموندہ سے نا باروٹ ءِ۔ دانا زی آ جوڑ مروک آ فلم 2021 ئٹ وینس فلمی میلہ ٹی گولڈن شیئر کٹاسس۔
اکیڈمی نا پاننگ ءِ کہ کتاب ئٹ اسہ 23 سن نا راوی نا بے قانودی چنا بِٹفنگ نا باروٹ اونا “طبی وڑ آ کچ ئٹ ہیت کننگ” ایرنو نا تخلیق آتیٹ اسہ بے مٹ ءُ کاریم ئسے۔
فرانس نا مسکوہی وزیر ربیدگ روزلین بیچلوٹ ٹویٹر آ نوشتہ کرینے کہ “ایرنو اسہ اندنو نوشتکار ئسے ہرا زند نوشت نا ڈول ءِ بنجائی ہند ئس تسونے۔ مننگ کیک کہ کس اونا سیاسی خیال آتون امنا کپ ولے ہر اسٹ اونا طاغتور و برجاء آ کاریم ءِ سلام کے۔