تدوکا دے تیٹ خاران ٹی مرگ ئنا گواچی مروک مسکوہی چیف جسٹس نور محمد مسکانزئی نا خونی ءِ کاؤنٹر ٹیررازم ڈیپارٹمنٹ (سی ٹی ڈی) دزگیر کننگ نا دعویٰ کرینے۔
سی ٹی ڈی نا رد ئٹ دزگیر مروک بندغ نا چاہنداری شفقت یلانزئی عرف دلاور نا پن ئٹ مسنے اندن پن کروک ورنا ءِ تدوکا دے تیٹ زوراکی ئٹ بیگواہ کننگاسس۔
سی ٹی ڈی نا رد ئٹ دزگیر مروک بندغ نا تعلقداری بلوچ آجوئی خواہوک تنظیم آن ءِ ہرا مسکوہی چیف جسٹس بلوچستان جسٹس نور محمد مسکانزئی نا خوْن آن بیدس ایلو کارروائی تیٹ اوار مسنے۔
سی ٹی ڈی دعویٰ کرینے کہ دزگیر مروک بندغ آن بھلو کچ اسیٹ سلاء و گولہ بارود ہم خنانن۔
ایلو پارہ غا پن کروک بندغ نا خاہوت سی ٹی ڈی نا دعویٰ تے رد کریسہ پارینے کہ دا بیرہ سرکاری چم ئسے ہرا خانہ پری کن غٹ دوبہ تے شفقت یلانزئی آ خلنگ ءِ۔
یاتی مرے تدوکا دے تیٹ شفقت یلانزئی تون اوار مُسہ بندغ ءِ پاکستانی ڈھکوک ادارہ غاک زوراکی ئٹ بیگواہ کریسر۔
بیگواہ مروک آتیٹ جابر یلانزئی ولد پذیر احمد، نجیب اللہ یلانزئی ولد محمد حسین و شفقت یلانزئی ولد عبدالرحیم اوار ئسر۔
خاہوت نا رد ئٹ اوفتیان نجیب و جابر ءِ فورسز یلہ کریسس اندن شفقت داسکان اوفتا دزگیر ئٹی ءِ۔
یاتی مرے بلوچستان ئٹ سی ٹی ڈی نا کاروائی تے راج دوست ٹولیک و بندغی حق آتا تنظیم آک مالو آن شکبر پارہ۔ راج دوست آتا رد ئٹ سی ٹی ڈی ہم پاکستانی ڈھکوک ایجنسی تا وڑ بندغ تا بیدس عدالت دزگیری تون اوار خون تیٹ ہم اوار ءِ۔
سی ٹی ڈی داڑان مالو ہم بلوچستان ئٹ زوراکی ئٹ بیگواہ مروک بندغ تے دروغ نا مونتس ئٹ خون کریسہ بسنے۔ تدوکا دے تیٹ کاؤنٹر ٹیررازم ڈیپارٹمنٹ (سی ٹی ڈی) نا اسہ کاروائی ئس دروغ پاننگانے ہراڑے مالو آن بیگواہ مروک چار بندغ ءِ نوشکی ٹی دروغ نا مونتس ئٹ خون کننگا