تدوکا نن نادرست بندغ آک ضلع کیچ ئٹ خان کلگ ہائی اسکول دازن ءِ خاخر تریسہ بھس کریر۔
حوال تا رد ئٹ دفتر ئٹ تخوک کلاس نوہ و دہ نا امتحانی فارم و فیس، سروس بُک، سائن بورڈ، حاضری رجسٹر، کرسی، ٹیبل، پنکھا، دری، الماری تون اوار کہی کتاب آک ہشنگسہ ہس مسر۔
علاقئی حوالکار تا پاننگ ءِ کہ پن کروک اسکول ایب کیب ئنا جواننگا اسکول آتیان اسٹ ئسے۔ واہم تدینی نا سوب آک داسکان سماء تمتنو۔
تدینی نا حوال پولیس ءِ تننگا، گڈیکو حوال اسکان ہچو دزگیری ئس عمل ئٹ بتو۔
یاتی مرے ضلع کیچ ئٹ اسکول تے خاخر تروک آ تدینی تیٹ ودکی مننگ ءِ۔ تدوکا توہ نادرست بندغ آک تحصیل بلیدہ نا یونین کونسل الندور ئٹ ٹہیفوک اسٹ انگا پرائیوٹ اسکول ءِ خاخر تریسہ بھس کریر۔
تدوکا سال الندور ئٹ سرکاری اسکول نا منہ کوٹی ءِ خاخر تننگاسس و گلی بلیدہ ٹی اسہ اسکول ساچ ءِ ہم خاخر تننگا۔
اندن داڑان بیدس ضلع پنجگور و کیچ ئٹ پرائیوٹ اسکول تیا جلہو و خاخر تروک آ تدینیک مونا بننگ ءُ۔