بلوچستان ئٹ نہاد آ تیٹ ودکی و نُت ئنا نیستی آن الس فریشان۔ حکومت نُت ئنا نیستی ءِ توننگ ئٹی بےسہب۔ بلوچستان نا صنتعی شارحب ئٹی نُت ئنا کلو 160 اسکان سر مس و کُکُڑ نا سو الس ئنا دسترس آن پیشن مس۔
محکمہ خوراک بلوچستان نا کنڈ آن گچین کروک نُت ئنا ونڈ نا بے رسینگ نا سوب آن ضلع کیچ ئٹ نُت ئنا نیستی ودی مسنے۔
انجمن تاجران تربت عدالت آ سر مس۔ نُت، غلہ و کُکُڑ ہلنگ آ بے وس پرائس کنٹرول کمیٹی نہاد تا ودکی ءِ توننگ ئٹ اسُل بےسہب ءِ وکُننگ نا گڑا تا چیک اینڈ بیلنس نا ہچو وجود اس اف۔
بست و بند فوٹوسیشن کاروائی تسکان سلوک ءِ، شاریک منافع خور تاجر آتا دو آن لُٹ ئنا گواچی ولے سوج کروکو کس اف۔
دا بابت ئٹ پاننگک کہ بلوچستان ئٹ نُت و غلہ نا نیستی نا سوب صنعتی شار حب ئٹ منافع خور تاجر آک کُننگ نا گڑا، نُٹ، برنج توناوار کُکُڑ نا نرخ آتیٹ بے کچ ودکی کرینو۔
خواری کش تپہ و شاری تا بہا ئٹ کُن و خور نا گڑاتا ہلنگ نا تاغت اف۔ دا وخت آ حب شار ئٹ 40 کلو گرام نُت 6400 روپئی حب فلوملز 40 کلو گرام نُت 5600 روپئی و غلہ 50 کلو گرام 8800 روپئی آ بہا مننگ ءِ و برنج نا نرخ آتیٹ ہم فی کلو 40 روپئی ودانے۔ نرخآتا ودکی آ شاری تا پاننگ ءِ کہ حب شار ئٹ نرخ آتا ودکی غٹ ریکارڈ آتے پرغانے۔ سندھ، پنجاب و کے پی کے ٹی نُت ئنا نرخ آک کم ءُ وبلوچستان نا صنعتی شار حب ئٹی نُت ئنا نرخ آک آسمان تون ہیت کیرہ۔
کراچی نا مارکیٹ آک حب آن 25 کلومیٹر نا مُری آٹو داڑان بیدس حب ئنا شاری تے کراچی نا نرخ آتیا نُت بہا اٹ رسینگ اف۔
ضلع کیچ تینا ونڈ نا غلہ آتیان پد تموک ءِ۔ کراچی آن نُت بننگ نا سوب آن زیات نیستی ودی مننگ نا خلیس ارے۔ تدوکا توہ کن گچینمروک 7355 گوڑی تا جاگہ غا بیرہ 2000 گوڑی غلہ تننگانے، 9 لکھ ئنا آبادی نا ضلع کیچ کن محکمہ خوراک بلوچستان نا کنڈ آنگچین مروک غلہ نا ونڈ نا بےرسینگ نا سوب آن کیچ ئٹی نُت ئنا نیستی ودی مننگ ءِ۔
نُت نسوک مل تا حوال تا رد ئٹ محکمہ خوراک بلوچستان نا کنڈ آن تدوکا توہ صوبہ کن اسہ لکھ گوڑی غلہ بہا ہلنگا ہراڑان کیچ ئنا 9 لکھ ئنا آبادی کن دسمبر ئٹ 7355 گوڑی گچین کننگا، ہراڑان بیرہ 2 ہزار گوڑی کیچ ءِ تننگا۔ ہرا نا سوب آن مخلوق ضلع کن کراچی وایلو شار تیان بروک نُت آتیا گزران کننگ ءِ۔