خضدار آن پاکستانی لشکر نا دو آن دزگیر مننگ آن گڈ بیگواہ مروکا اِرا ورنا یلہ مسر۔
شابیتی حوال تا رد ئٹ تدوکا سال نا ایسر ئٹ خضدار نا علاقہ گریشہ آن پاکستانی لشکر اِرا ورنا سراج نور و عارف بلوچ ءِ بیگواہکریسس۔
فورسز نا دو آن دزگیری آن گڈ ہڑتوما خوانندہ تا خاہوت آک کراچی پریس کلب ئٹی پریس کانفرنس کریسہ پاریر کہ عارف ولد گاجیانہند سریچ گریشہ و سراج نور ہند اسپیکنری گریشہ ءِ اوفتا علاقہ گریشہ خضدار آن ہموتم زوراکی ئٹ بیگواہ کننگا ہراتم او خڑک ئناخلق بوگی ٹی تینا سیال آتون اوڑدئی کننگ آن گڈ موٹر سائیکل آ پدا بننگ اسر۔
خاہوت آتا رد ئٹ دزگیر کننگ آن مُست اوفتیا سم کاری ہم کننگا، ہرا نا سوب آن او موٹر سائیکل آن تماسر و اوکان گڈ اوفتے بیگواہکننگا۔
واہم اینو ہڑتوما ورناک یلہ مریسہ تینا اُرا تیا بسر، اوفتیان خڑک ءُ حوالکار اس ہڑتوما خوانندہ تا یلہ مننگ نا پک کرینے۔
یاتی مرے بلوچستان ئٹ زوراکی نا بیگواہی تا لڑ بھاز ہُرے آن برجاء ءِ ہراڑے منہ بیگواہ بندغ یلہ مسنو واہم بیگواہ بندغ آتا یلہ مننگ کنتوار ارفوکا گل آتا رد ئٹ پین بندغ زوراکی ئٹ بیگواہی نا گواچی ہم مسنو۔
گل ئنا رد ئٹ بلوچستان ئٹ جتاء تپہ تیان تعلقداری تخوک 20 ہزار آن زیات بندغ بیدس عدالت زوراکی ئٹ بیگواہی نا گواچی مسنوہرافتیٹ بھلا کچ سیاسی خوانندہ و راہشون تا ءِ۔