بلوچستان ئٹ پارلمینٹرین آتا پوسکنا پارٹی تیٹ بال
ٹی بی پی سرگپ
سیاسی تجزیہ کار آتا رد ئٹ بلوچستان ئٹ گڈیکو وار صاف گچینکاریک ہفتاد نا دہائی ٹی مسوسر و ہفتاد نا گچینکاری تیان گڈ اخسحکومت گچین کننگانو او الس ئنا ووٹ آتیٹ نہ بلکن پاکستانی لشکر نا پالیسی تا رد ئٹ گچین کننگانو و اوفک فوج ئنا پالیسی تےبلوچستان ئٹ عملی وڑ ئٹ ایسری تسنو۔
ہمو پارٹیک ہرا پاکستانی لشکر ءِ منیتورہ اوفتا حکومت ایسر کننگا یا اوفتے حکومت جوڑ کننگ الیتور۔ نوزدہ سد ہفتاد و سئے ئٹی نیشنلعوامی پارٹی نا اکثریتی حکومت ءِ ایسر کریسہ بلوچستان ئٹ لشکر کشی کننگا و جام غلام قادر نا سروکی ٹی اقلیت حکومت کریسس،نوزدہ سد نود ئٹ نواب اکبر خان بگٹی نا جمہوری وطن پارٹی ءِ اکثریت دوئی مننگ آن بیدس حکومت جوڑ کننگ کن الیتور و نوزدہ سدنود و ہشت ئٹ بلوچستان نیشنل پارٹی نا حکومت اِرا سال آن گڈ چم آتیٹ ایسر کننگاسس۔
بلوچستان ئٹ ہر گچینکاری تیان مالو پولیٹیکل انجینئرنگ بناء کننگک و سیاسی شخصیت، سردار و نواب، نشہ بہا کروک و ڈیتھ اسکواڈچلیفوک آتا وفاداری ہم بدل مریک۔ اِرا ہزار اِرٹ ئٹی ہرا بندغ آک مسلم لیگ ق ئٹ اسر، ہمو بندغ آک اِرا ہزار ہشت ئٹی پاکستان پیپلزپارٹی و اِرا ہزار سینزدہ ٹی مسلم لیگ ن ئٹی ہناسر۔ اِرا ہزار ہژدہ ٹی دا غٹ ءِ بریگیڈیئر خالد ننوئی نن اوار کریسہ بلوچستان عوامیپارٹی (باپ) ءِ جوڑ کرے و گچینکاری تیان گڈ اوفتا دوٹی حکومت ءِ تس۔ بلوچستان ئٹ ملٹری انٹیلی جنس و آئی ایس آئی نا تین پہ تیننا جنگ آتیٹ سر وزیر نا چہرہ جام کمال و قدوس بزنجو نا دروشم ئٹ بدل مریسہ کرینے۔
داسا اندا کل پارلیمانی سیاستدانک پاکستان پیپلز پارٹی و جمیعت علماء اسلام ئٹ بال کننگو، ہرا اسہ اشارہ سے کہ بلوچستان ئٹبروکا حکومت پیپلز پارٹی و جمیعت نا مرو یا اِرا ہزار ہشت ئنا حکومت آنبار مرو، ہرا ٹی بلوچستان اسمبلی نا شست و چار آن یار محمدرند آن بیدس ہرانا او وخت ئنا سر وزیر اسلم رئیسانی تون خاہوتی دژمنی ئس، ایلو شست و سئے باسک آک بلوچستان اسمبلی ٹی وزیراسر۔
پاکستان پیپلز پارٹی ہرا ہژدہمیکو ترمیم و صوبائی خودمختاری نا وکالت کیک و پارٹی ءِ سندھ ئنا حق آتا رکھوک پائک، اندا پاکستانپیپلز پارٹی بلوچستان ئٹ ڈیتھ اسکواڈ و نشہ بہا کروک آتے پارٹی ٹی اوار کریسہ بروکا حکومت ءِ جوڑ کننگ کن کوشست کننگے۔بلوچستان ئٹ پارلیمانی سیاست دیوالیہ نا گواچی مسنے و اسمبلی نا باسک آتے پاکستانی لشکر نا میجر و کرنل رینک ئنا آفیسر آکگچین کیرہ، ہرا نا سوب آن بلوچستان ئٹ حکومت آک الس ئنا جاگہ غا فوجی اسٹیبلشمنٹ ئنا منوک ءُ و اوفتا پالیسی تے ایسری ایترہ۔