پاکستان ئٹ روپئی نا مون ٹی ڈالر نا نرخ ئٹ اسہ وار پدا ترندی ئٹ ودکی رپورٹ کننگانے۔
ایکسچینج کمپنیز نا کنڈ آن ڈالر نا قدر آ گچین کروک ہد (کیپ) ءِ ایسر کننگ آن گڈ اوپن مارکیٹ تون اوار انٹر بینک مارکیٹ ئٹ ہم ڈالر نا نرخ ئٹ ودکی مریسہ ءِ۔
انٹر بینک مارکیٹ ئٹ پنچ شمبے آ پوریائی وقت ئنا اولیکو بشخ ئٹی ڈالر نا نرخ 10 روپئی نا ودکی آن 241 روپئی اسکان سر مس۔
فاریکس ڈیلرز تا رد ئٹ اوپن مارکیٹ ئٹ 26 جنوری آ پوریائی وخت آتا اولیکو بشخ ئٹی اسہ امریکی ڈالر نا نرخ 245 روپئی ءِ اندن تدوکا دے 243 روپئی آ مارکیٹ بند مسوسس۔
انٹر بینک مارکیٹ ئٹ دا وخت امریکی ڈالر 241 روپئی نا پڑ آ ٹریڈ کننگ ءِ۔
معاشی کاریم تا چاہندار عبدالعظیم پارے کہ ایکسچینج کمپنیز نا کنڈ آن ڈالر ریٹ آن کیپ ءِ مُر کننگ آن گڈ ارٹمیکو دے ہم روپئی نا قدر ئٹ تمنگ خننگانے۔
‘مارکیٹ ئٹ اِرا روپئی آن زیات ئنا فرخ ریکارڈ کننگانے۔’
اونا پاننگ ءِ کہ روپئی نا قدر ئٹ کمبوتی مرو گڑا الس آ کُبینی نا باریم ودو۔ دا وخت الّمی ءِ کہ ملکی برآمد آتیٹ ودکی کننگے و اندنو حالیت جوڑ کننگ مرے کہ سرمایہ کار آک بیدس خُلیس آن سرمایہ کاری کننگ کیر۔