ایران نا بنجائی شار تہران ئٹ ٹہیفوک اسہ یات گار ئسے نا مونا ناچ کروک اسہ جوڑی ئسے 10 سال قیذ ئنا سزا بِنفنگانے۔
فرانسیسی حوال تروک ادارہ اے ایف پی نا رد ئٹ بندغی حق آتا باسک آک پارینو کہ ‘پن کروک جوڑی نا ناچ حکومت تون شرہ نا درشانی ئس۔’
آستیاژ حقیقی و اونا دشتار امیر محمد احمدی ہڑتوما تا سن 20 سال ئنا خڑک ءِ۔ اوفتے تدوکا سال نومبر ئٹ اسہ ویڈیو اس تالان کننگ آن گڈ دزگیر کننگاسس۔
او ویڈیو ٹی جوڑی ءِ تہران نا آزادی ٹاور نا مونا مابتی وڑ ئٹ ناچ کننگ آ خننگ مریک ہراٹی آستیاژ حقیقی ایران ئٹ زالبول آتیکن السی ہند آتیا الّم پِن کروک گُد ہم بینتنے۔
امریکہ ٹی کاریم کروک ہیومن رائٹس ایکٹوسٹس نیوز ایجنسی (ایچ آر اے این اے) پارینے کہ ‘تہران نا اسہ عدالت اس آستیاژ حقیقی و اونا دشتار ءِ دئے سال شش تُو قیذ ئنا سزا بنفینے و انٹرنیٹ ءِ کاریم ئٹ ہتنگ و اوفتا ملک آن پیشن ہننگ آ ہم رکھ خلنگانے۔’
ایچ آر اے این اے نا رد ئٹ ‘دا جوڑی انسٹاگرام بلاگرز نا ڈول آ تہران ئٹ بھاز پنی ءِ۔’
اوفتے ‘بدعنوانی نا اُست بڈی و پاش بے باکی تالان کننگ و راجی رکھ ءِ نسخان تننگ نا کوشست’ ئنا ڈوہ ئٹ سزا بنفنگانے۔
نیوز ایجنسی نا رد ئٹ پن کروک جوڑی نا خاہوت آتے وکیل آتیا ہننگ کن الیتور اندن اوفتا ضمانت آ یلہ مننگ نا خواست ہم رد کننگا۔
پاننگک کہ آستیاژ حقیقی ءِ تہران آن پیشن اسہ ملامت ءُ قرچک جیل اسیٹ تخنگانے ہرا نا حالیت نا بارو ئٹ بندغی حق آتا باسک آک ہر وخت خُلیس نا درشانی کریسہ کیرہ۔
یاتی مرے کہ تدوکا سال ورنا زالبول مہسا امینی نا پولیس ئنا دزگیر ئٹ مرگ آن گڈ ایرانی حکومت نا کنڈ آن ہر وڑ ئنا شرہ کروک توار تے چُھپ کرفنگک۔
مہسا امینی نا مرگ آن گڈ ایران نا جتاء علاقہ تیٹ بھلو برانز مس و اقوام متحدہ نا رد ئٹ دا وخت اسکان کم و ود 40 ہزار بندغ ءِ دزگیر کننگانے۔