لسبیلہ ٹی بس ئنا بیم بش کروک تدینی
ٹی بی پی سرگپ
لسبیلہ نا بیم بش کروک تدینی ٹی چِل و یک بندغ کسکنو و مُسہ ٹپی کراچی نا اسپتال ئٹ دارو درمان مننگ ءُ۔ لسبیلہ نا بیم بش کروک تدینی اولیکو اف بلکن کوئٹہ – کراچی، پنجگور – کوئٹہ، تربت – کراچی، و پنجگور – کراچی سڑک آتیا چرجوئی تون بیم بش کروک تدینیک مریسہ بریرہ، ہرافتیان ہزار آ مرگ آک مسنو۔ اسہ اندازہ ئسے نا رد ئٹ دا سڑک آتیا مروک تدینی تیان سال ئٹی ہفت ہشت ہزار مرگ آک مننگ ءُ۔
لسبیلہ تدینی ٹی ٹپی مسافر نا پاننگ ءِ کہ بس ئنا خرابی آن بیدس و مسافر آتا منت کننگ آ ہم سفر برجاء تخنگا اندن سفر نا وخت آ اسہ مسافر اس تینا خاہوت ءِ میسج کریسہ حوال تسوسس کہ ڈرائیور ترندی ئٹ بس ءِ چلیفنگ ءِ و ٹرالر آتے کراس کننگ ءِ۔ بس ئنا خواجہ و ڈرائیور آتا بے پامی آن کیہی تدینیک مونا بسنو ولے حکومت تدینی تے توننگ کن عملی پالیسی جوڑ کننگ نا جاگہ غا بیان بازی تے اسکان رہینگانے۔
حکومت آ دا دوبہ خلنگک کہ بلوچستان ئٹ اخس کہ سڑک جوڑ کننگانے، گمانی وڑ ئٹ او غٹ نوآبادیاتی پالیسی تا بنداو آ جوڑ کننگانو تاکن بلوچستان ئٹ مڈی تا “لُٹ و پل” آن گڈ پاکستان نا ایلو بشخ آتے اسکان اوفتا دننگ اڑزانی ئٹ مرے۔ کوئٹہ – کراچی سڑک شست ئنا دہائی ٹی جوڑ کننگاسس تاکہ نوکنڈی و جھالاوان نا سنگ مرمر و ایلو مڈی تے ارزانی ئٹ کراچی آ دننگے۔
داڑان بیدس دا تدینی تا مننگ نا اسہ بھلو سوب اس دادے کہ وخت اتون اوار اوار بلوچستان نا سڑک آتیا ہن بر ودنگ ءِ ولے داڑان بیدس بلوچستان ئٹ اسہ ہم چار رویا سڑک اس ساڑی اف، وار وار ئنا السی خواست آتیان پد ہم آر سی ڈی سڑک ءِ دعویٰ تیان بیدس چار رویا جوڑ کننگ متو، ہرانا سوب آن تدینی تا کچ ئٹ دے پہ دے آن ودکی مریسہ کیک۔
دا تدینی تیٹ مرگ آتا اسہ بھلو سوب اس، ایمبولینس و ایمرجنسی سروس آتا کمبتی ہم ارے۔ اگہ بلوچستان نا سڑک آتے چار رویا جوڑ کریسہ، ایمرجنسی سروس آتے جوان کننگے و مسافر بس آتے ریگولیٹ کننگے گڑا بھاز آ بے بہا غا ساہ تے رکھنگ مریک۔