نوشت: دروشم بلوچ
دی بلوچستان پوسٹ
11 فروری 2011 نا نن ءِ کس اُست آن دننگ کپرو۔ توتک نا چنا چنا او دے ءِ اُف آڑسندہ، خڑینک ئٹ اُست آ اتیرہ۔ سینزدہ سال آن پد ہم اگہ کس تینا خنتے تر کے او نن اوڑا خرین ءُ تغ ئسے نا وڑ ئٹ اسہ لڑزہ اس شاغک، ٹپی آ جغرک اینو ہم تینا تے است آ ہتیر خڑینک خلیرہ، پاننگ کن 11 فروری نا دے ءِ سینزدہ سال مسونے ولے اینو ہم او نن ئنا دڑد و تکلیف آک ننا زند ءِ تینتون تفوک تخوک ءُ۔ 11 فروری نا چلہ ئی نن ئٹی اُرا نا کل مخلوق اسٹوپ نا رہی آ تولوک ہیت و گپ کننگ اسر، پیشن شنزہ ئٹ پِر مننگ ئس، کس پیشن ہننگ کتوکہ گڑا اینو کل مارکوک اُرا ٹی اسر ہر اسٹ ہیت و گپ ئٹی اختہ ئس، باز اُرے آن پد اینو کل اوار ئسون گڑا کس سنگت آتا کسہ تون اختہ ئس، کس راج ئنا بے وسی ڈکھ دڑد ئنا کسہ بنفنگ ئٹ اختہ ئس، وار اس دشمن نا ظلم ئنا اُف اڑسندہ ئس وار اس دشمن نا نزوری تیا ٹاکو و مخنگ ئس اندن گمان مسکہ اُرے آن پد زند ولدا زندہ مسونے کل ہوار تولوک ولدا زند ءِ زندہ کننگ اُن۔
ہیت و گپ ئٹی سما تمتو نن امر گدرینگا، نن ئنا یک بجہ مسس ہمو وخت آ پِر ہم دیخہ بس کرے۔ نن کل خاچنگ کن بش مسون ولے چنکا ایلم اسٹوپ نا رہی آ تولوک فون آ تینا شئیر بیننگ ئس، لمہ ایلم نا پیشانی آن بُک اس ہلک پائے مار کہ خاچ داسا ایلم ہم زُو زُو لمہ نا دو آن بُک اس ہلک تینا ہند ئٹی پُترینگا۔ ولدا نن ہم تینا ہند آتیا خاچنگ کن ہنان۔ ہمو نن کنے ہچ تغ بننگ الو سما اف انتئے کنا اُست ئٹی اسہ خلیس اس ئس ایلم تے کن دعا کریسہ ای مُچا نن ءِ گدریفیٹ، سہب ئنا بانگ نا توار مس ای بش مسوٹ نماز خواننگ کن، لمہ ءِ ہم نماز کن بش کریٹ۔ جند کہ دزنماز ہلنگ کن بدنی ٹی دیر ارفیٹ کہ ہمونی تون سم تا توار مس کنا دو آن دیرک تمار ای پوہ متوٹ توار ہراکا بننگ ءِ ای رُمب کریٹ ایلم نا پارہ غا کاو ایلم ءِ اُریو او ہراڑے کے ہمونی تون ایلم پیشن پیشتما۔ ایکا لمہ ہم کوکار کریسہ پیشن بس اُرا نا کل بندغ آک سم تا توار ءِ بنگر کل پیشن حویلی نا نیام آ بسر۔ ایلم پوہ مس کہ پاکستان نا فوج توتک آ جلہو کرینے۔ ایلم تدینگسہ ہنا دالان آن تینا فون ءِ ارفنگ کن ولے ہمونی تون دالان نا چھت آن اسہ مون پُچی ءُ فوجی اس حویلی ٹی درکا بس ایکا حویلی نا در آ زورانکا ٹک ٹک مننگ ئس۔ ہندا چھت آن درکوک آ فوجی ہنا حویلی نا در ءِ ملا پین دہ بیست فوجی اُرا ٹی پیہار دالان آ مون کریر۔
ای بُت آنبار تینا ہند آ سلوک ہچ پوہ مننگ الوٹ انت مننگ ءِ، فوجیک توفک تون دالان نا تہٹی پیہار کنا باوہ فوجی تے دالان ئٹی پیہنگ آ خنا اوفتا رند ئٹ او ہم دالان ئٹی پیہا، فوجیک دالان آن کنا چنکا ایلم نا دو تیٹی ہلکر اودے گریسہ حویلی نا نیام آ ایسر، پین اِرا فوجی باوہ نا کنا دو تیٹی ہلکر اودے ہم گریسہ حویلی نا نیام آ ایسر، ایلوفک تا اُرا تے پٹ و پول کننگ ءِ بناء کریر۔ ایلم نا دو تے اونا پد آ تفیر، حویلی نا نیام آ گوڈ آتیا تولفیر تہ، باوہ ءِ ہم ایلم نا رہی آ گوڈ آتیا تولفیر، ولدا کل فوجیک اسٹ اسٹ آ بسر حویلی نا نیام آ مُچ مسر کنا باوہ غا توار کریر بھلا مار نا ہرادے؟ کنا باوہ پارے کنے سما اف۔ ولدا توار کریر بھلا مار نا ہرادے؟ کنا باوہ ولدا ہمو ورندی ءِ تس کنے سما اف، اندنی تون دا ظالم آک کنا پیرنگا باوہ ءِ لٹ خلنگ بناء کریر۔
ای، لمہ، ہیڑ رمب کرین باوہ ءِ رکھنگ کن ولے دا ظالم آک ایلم نا کاٹم آ توفک ءِ توریر پائے اگہ مونا بسرے دادے خلون نن تینا جاگہ تیا سلیسُن۔ دا ظالم تا نت تیا کنا لمہ تینا گُد ءِ بٹے دو تفے پائے کنا اَرغ ءِ خلپبو ولے دا ظالم آک ننا مونا ننا باوہ ءِ اندون لٹ خلکر کہ اونا تیوہ مون دتر چر مس، نن او ظالم تا مون پِٹان اوغان ولے او کنا باوہ ءِ خلنگ آن ہچ مڑتوس، فوجیک اُرار نن دُنی آ اوفتے بھلا ایلم نا حوال تفنہ گڑا او چنکا ایلم ءِ لٹ تننگ ءِ بناء کریر۔ کنا لمہ آن چنا نا تینا دن لٹ تننگ سگنگ متو او رمب کرے مار ئنا تینا زی آ بٹے تینے کہ تورو لٹ آتے چنا آن تینا، اسہ فوجی اس کنا لمہ نا کوپہ ٹی ہلک لمہ ءِ دن مُر خسا، لمہ ولدا رمب کریسہ بس چنا ءِ تینا رکھنگ کن ولدا فوجی لمہ نا کوپہ ٹی ہلک اودے مر خسا، لمہ مسٹمیکو وار آ بش مس ولدا بننگ کن فوجی اس ہلک لمہ ءِ تورے۔ ای تتوٹ باوہ ءِ لٹ آتیان رکھیو، ایلم ءِ رکھیو یا لمہ ءِ۔