تدوکا سال دسمبر ٹی زوراٹ بیگواہ مروک لسبیلہ یونیورسٹی نا خوانندہ عبدالقدوس قمبرانی داسکان یلہ مننگ کتئو۔ بیگواہ خوانندہ نا اسہ ایلم ئسے نا جشوک آ جوْن ہم داکان مست خننگانے۔
لسبیلہ یونیورسٹی آف ایگریکلچر واٹر اینڈ میرین سائنس اوتھل (لوامز) نا خوانندہ عبدالقدوس قمبرانی داسکان یلہ مننگ کتئو۔ او کوئٹہ سمنگلی روڈ آ اسہ ہوٹل ئسے آن 28 دسمبر 2022 نا شام نادرست سلاء بند بندغ آک زوراکی ئٹ گاڑی ٹی تولفیسہ بیگواہ کریر۔
خاہوت آن رسینگوک حوال تا رد ئٹ اودے یک ونیم تو آن ہم زیات وخت گدرینگانے ولے اونا بابت اسہ وڑ ئنا ہم حوال اس رسینگتنے، حوال تا رد ئٹ عبدالقدوس قمبرانی یونیورسٹی ٹی امتحان تریسہ چھٹی تے گدریفنگ کن کوئٹہ ٹی تینا ارا غا ہناسوس و ہمو شام سنگت آتون اوار بازار آ ہناسس ہراڑے اودے زوراکی ئٹ بیگوا کننگا۔
خاہوت پک کریسہ پارے کہ او یک و نیم تو ءِ اندا سوب آن چھپ ئسر کہ بلکن پولیس سروسوجنا پاریسہ اودے تینتون دروک آک زوت اُرا غا سر کرور ولے اوفتا صبر و چھپی بے سہب پک مس۔
یاتی مرے داکان مست عبدالقدوس قمبرانی نا اسہ ایلم اس باقر قمبرانی سال 2013 ٹی قلات آن زوراکی ئٹ بیگواہ کننگاسس ہرادے اِرا سال آن گڈ یلہ کننگا اندن اندا نیام ئٹی لسبیلہ یونیورسٹی ٹی واٹر ریسورس منیجمنٹ نا خوانندہ اونا ایلو ایلم حفیظ قمبرانی ءِ 14 مارچ 2015 آ قلات آن زوراکی ئٹ بیگواہ کریسر ہرانا جشوک آ جون اسہ تو ئسے آن گڈ 24 اپریل آ خننگاسس۔
خاہوت آن رسینگوک پین حوال تا رد ئٹ تدوکا دے تیٹ قدوس قمبرانی نا یونیورسٹی ٹی ارٹمیکو سمسٹر نا امتحان آک ہم بناء مسوسر ہرا داسا ایسر ہم مرور ہراڑان اونا تعلیمی سال و سمسٹر زوال مننگ نا خلیس ہم ارے۔
خاہوت نا پاننگ ءِ کہ اسہ ہم بے گناہ خوانندہ ءِ ٹک کننگ بھلو بے دادی ئسے و تعلیم دژمنی ئسے۔ قدوس قمبرانی اسہ خواری کش و لائخ ءُ خوانندہ ئسے ہرا وڑ ایلو باشعور بلوچ خوانندہ آتیا زمین تنک کننگانے، قدوس ہم اندا بے گناہ بیگواہ بلوچ ورنا تیان اسٹ ءِ ہرا نادرست سلاء بند و ڈیوائس دوٹی بندغ آتا دو آن زوراکی ئٹ بیگواہ نا گواچی مسونے۔
اندن خاہوت بڑز کوالخوا و بیگواہ بندغ آتیکن ٹہیفوک کمیشن آن خواست کرینے کہ قدوس قمبرانی ءِ زوت آن زوت پاش کیر تاکن او تینا خواننگ نا لڑ ءِ برجاہ تخینگ کے۔