پاکستان نا پِنی آ اداکار و مہماندار ضیا محی الدین 91 سال نا سَن ئٹ کراچی ٹی بیران مس و اونا نماز جنازہ ڈفینس فیز فور ٹی خواننگانے ۔
سنہ 1931 ٹی پنجاب نا شار فیصل آباد ٹی ودی مروک ضیا محی الدین پاکستان نا اولیکو فلم ” تیری یاد ” ءِ نوشتہ کریسس ۔
تینا کُبین و جادوئی توار نا سوب آن بندغ آتا اُست آتیٹ ہند جوڑ کروک ضیا محی الدین نا کہنگ آ تیوہ پاکستان ٹی اوڑکن مہر کروک آک ڈُکھ نا درشانی کننگو۔
اردو ادب و شاعری نا جہان ٹی سوگوْ ہند تخوک آن لائن پورٹل ‘ریختہ’ اسہ ٹوئٹ اسیٹ نوشتہ کرے کہ ‘ضیا محی الدین نا کہنگ اُست ہلوک ڈکھ ئسے، ہراڑان اسہ اندُنو ہورکی اس ودی مس ہرا اسُل پُر مفرو۔’
ضیا محی الدین 1949 ٹی گورنمنٹ کالج لاہور آن گریجویشن کریسس اندن اوکان گُڈ آسٹریلیا و انگلینڈ ٹی ہم خوانیسہ کرے۔ او رائل اکیڈمی تھیٹر آرٹس تون ہم تفوک ئس و ڈائریکشن نا تربیت ہم ہلک اندن اداکاری و صداکاری نا کنڈا ہم ہنا۔
اوکان گُڈ ہم او تلہ تون تفوک ئس و بھاز آ ڈرامہ آتیان بیدس منہ ہالی وُڈ فلم آتیٹ ہم کاریم کرے۔
سنہ 1970 ٹی ہرا وخت او پاکستان آ ہنا گڑا پاکستان ٹیلی ویژن آ ‘ضیا الدین شو’ نا پِن ئٹ سٹیج پروگرام ءِ بناء کرے ہرا بھاز ارفنگا۔
اندا وڑ او اسہ پاکستانی فلم ‘مجرم کون’ ئٹ ہم کاریم کریسس۔ او پی آئی اے آرٹس اکیڈمی نا ڈائریکٹر نا اوغدہ آ ہم کاریم کریسہ ئس۔
ضیا محی الدین ادبی فن پارہ تا صداکاری نا زریعت ئٹ پیش کننگ کن گچین چاہنداری تخاکہ او پی ٹی وی آن بیدس کہی نجی چینلز آتا پروگرام آتیٹ ہم اہم مضامین و ناول آتا اقتساب آتے خوانیسہ بنفے۔
اودے تغمہ حسن کارکردگی و ہلال امتیاز تون اوار پین داد ہم تننگا۔