بیست و یک فروری لمئی بولی تا جہانی دے
نوشت: شمس بلوچ
دی بلوچستان پوسٹ
بیست و یک فروری ءِ یونیسکو 1999 ٹی لمئی بولی تا جہانی دے نا پن تسونے۔ اندا سوب آن 21 فروری 2000 آن پد مچا جہان ئٹی لمئی بولی تا دے باقاعدہ یات کننگ مریک۔ دا پڑوْ ہموتم مس ہراتم بنگالیک (اے وخت نا دے ٹکی پاکستان) لمئی بولی کن تحریک چلیفیر ہرافتے خراج تحسین تریسہ دا پڑو مسک۔
1947 ٹی وختس کہ پاکستان جوڑ مس جغرافیائی حوالہ ئٹ اونا ارا بشخ ئسر ہراٹی دے ٹکی پاکستان (اے وخت بنگلہ دیش نا پن ئٹ پاننگاکہ) و دے کہیلینگ پاکستان (اینو نا پاکستان ئس)
1948 ٹی حکومت پاکستان اردو ءِ پاکستان نا اسٹ انگا بولی پِن تس، ولے دے ٹکی پاکستان نا بھازی مخلوق بنگالی زبان ئٹ ہیت و گپ کریرہ اندا سوب آن دے ٹکی پاکستان نا مخلوق برانز کرے انتئے کہ اوفتا آباتی زیات ئس و اوفتا لمئی زبان بنگالی ئس اردو ءِ اوفک پوہ مننگ کتوسہ اوفتا بولی گم مریسہ ئس او دا خواست کریر کہ بنگالی بولی ءِ ہم راجی بولی نا درجہ ایتر۔ دا خواست ءِ کل آن مالو دے ٹکی پاکستان آن دھیریندر ناتھ دتا 23 فروری 1948 ٹی پاکستان نا اسمبلی ٹی ارفے۔
دا برانز ءِ ایسر کننگ کن پاکستان نا حکومت کل جلسہ جلوس آتے کالعدم پِن تس او وخت جامعہ ڈھاکہ نا خوانندہ غاک لس مخلوق نا کمک ئٹ بھاز بھلو جلسہ کریر 21 فروری 1952 ٹی پولیس ہمو جلسہ کشوکا برانز تیا سم کاری کرے ہرافتے ٹی خوانندہ عبدالسلام ، ابوالبرکات ، رفیق الدین احمد ، عبدالجبار و شفیق الرحمن تون اوار شہید و بھاز آک ٹپی مسر دا تاریخ نا اسہ بیم بش کروک تدینی اس ئس ہراڑے بندغاک تینا لمئی بولی کن تینا ساہ ءِ ندر کریر۔ ہمو دے آن پد بنگلہ دیش نا مخلوق تینا شہید آتے یات کریسہ تینا لمئی زبان نا دے ءِ گدریفرہ۔
اندا وڑ نن بلوچ آتیکن ہم لمئی بولی نا دے بھاز اہمیت تخک انتئے کہ اگہ بولی متوکہ نن تین پہ تین نا ہیت ءِ سرپد مننگ کتونہ بولی اسہ راج ئسے نا پجار مریک دا وخت ننا بولیک براہوئی ، بلوچی ہڑتوما تا زی آ کاریم نا گرج ءِ انتئے کہ ننا بولی تے گم و گار کننگ نا بھاز زیات کوشست مننگ ءِ۔ ننے تینا بولی تا قدر ءِ کریسہ اوڑا کاریم کروئی ءِ انتئے کہ دیہاڑ ئٹی دنو بولی ہم مسونے ہرافتا زی آ کاریم متنے او گم و گار مسونو ہرافتا اینو ہچو وجود ئس اف ہندن اگہ اینو لس بلوچ تینا زمہ واری تے پوہ متو گڑا ہمو دے ام مر مروف ہرا دے ننا بولی نا ہچو وجود ئس مروف۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔