بلوچستان نا ضلع کچھی (بولان) ئٹ پولیس ٹرک آ خودکش تراک ئٹ کم و وَد 9 کارندہ مرگ ئنا گواچی مسر و ہفت ٹپی ءُ۔
ڈپٹی کمشنر کچھی سید سمیع اللہ آغا احوالکار آتے پارے کہ ‘بم تراک کچھی نا علاقہ ڈھاڈر ئٹ لنڈی کراس نا رہی آ مس ہراٹی بلوچستان کانسٹیبلری نا ٹرک ٹِک کننگا۔’
سر وزیر بلوچستان عبدالقدوس بزنجو پولیس آ مروک تراک نا مذمت کرینے۔
ایس ایچ او ڈھاڈر شوکت علی نا ردئٹ بلوچستان کانسٹیبلری نا کارندہ غاک سبی ئٹ سالانہ میلہ نا رکھ اکن ڈپٹی تننگ آن گڈ واپس کوئٹہ کن ہننگ ئسر۔
اونا رِدئٹ ‘تراک خودکس اس ئس و جلہو کروک موٹر سائیکل ئسے آ سوار اس ہرا موٹر سائیکل ءِ روان گاڑی تون ڈک تس۔’
ایس ایچ او نا ردئٹ تراک ئٹ کم و وَد 9 کارندہ مرگ ئنا گواچی مسر اندن ہفت کارندہ ٹپی ءُ ہرافتے سبی نا سی ایم ایچ ہسپتال آ دننگانے۔
او پارے کہ تدینی ہند آن تراک اٹ کاریم اٹ ہتوک موٹرسائیکل و جلہو کروک نا ازبہ تیتون اوار شاہدی تے مچ کریسہ پٹ و پول بنا کننگانے۔
اسہ دے اس مالو گوادر ئٹ پاکستانی لشکر نا قافلہ آ بم ترک ئٹ اسہ کارندہ اس مرگ ئنا گواچی و ہشت ٹپی مسر۔ دا جلہو نا ذمہ واری ءِ بلوچستان لبریشن فرنٹ ارفے۔
بلوچستان ئٹ زو تیٹ پاکستانی فورسز آ جلہو تیٹ ودکی خننگ اٹ بسونے۔ کولخواہ تا رِدئٹ اسہ تو ئنا نیامٹ پولیس، لیویز، فوج و مزور تیتون اوار 25 آن زیات بندغ مرگ ئنا گواچی مسونو۔
