بلوچستان نا ضلع آواران نا تحصیل جھاؤ نا جتا اسکول آتا خوانندہ آک کتاب تفرینگ نا برخلاف برانز کریر۔
گیشتر حوال تا رد ئٹ بلوچستان نا ساڑی سر وزیر قدوس بزنجو نا باوہ پیرئی علاقہ جھاؤ نا جتا اسکول آتا چناک واجہ باغ بازار ٹی نصابی کتاب تفرینگ نا برخلاف برانز کریسہ کتاب تننگ نا خواست کریر۔
برانز کروک چنا تا رد ئٹ تدوکا سال ہم کتاب تفرینگ نا سوب آن تعلیمی سال سخت زیمی مسوسس اندن ساڑی سال نا بناء مننگ ءِ ہفتہ اس گدرینگ آن بیدس ہم کتاب تننگتنے، چنا تا رد ئٹ تدوکا سال اوفتا تیوہ تعلیمی سال مفت مننگ آ اوفک سخت پریشانی تا گواچی مسوسر و دا سال ہم دا حالیت نا برجاہ مننگ نا خلیس ءِ۔
یاتے مرے کہ محکمہ خزانہ بلوچستان نا پارہ غان 56 کروڑ نا زر ریلیز مفرینگ نا سوب آن برجاہ سال محکمہ تعلیم نا پارہ غان زر تفرینگ آ مفت کتاب نا شینکاری مننگ کتنے۔
بلوچستان نا سرکاری اسکول و کالج آتیٹ پوسکنا تعلیمی سال کن جماعت اول آن دوازدہ اسکان یازدہ لکھ خوانندہ آتے مفت کتاب رسینگ نا امیت آک دم تسر۔